(පුෂ්පකුමාර මල්ලවාරච්චි)

මිනුවන්ගොඩ පොලිස් ස්ථානයේ ආපන ශාලාව පවත්වගෙන ගිය පුද්ගලයා කොරෝනා ආසාදිතයකු බව තහවුරුවීමෙන් එහි සේවය කරන  පොලිස් නිලධාරීන් සියලු දෙනාගේ පී සී ආර් පරීක්ෂණ පවත්වා ඔවුන් අවශ්‍ය වන පරිදි නිරෝධායනයට යොමු කිරීම හෝ වෙනත් අවශ්‍ය පියවර ගැනීමට නියමිත බව ගම්පහ ජ්‍යෙෂ්ඨ පොලිස් නිලධාරියකු සදහන් කළේය.

මේ හේතුවෙන් 150 ක් පමණ වන පොලිස් නිලධාරීහු පිරිසක් දැඩි අවදානමකට පත්ව ඇතැයි එහි සේවය කරන නිලධාරීහු සදහන් කළහ.

බ්‍රැන්ඩ්‍රික්ස් ආයතනයේ සේවිකාවන් කොරෝනා උවදුරට ගොදුරුවීමත් සමඟ මිනුවන්ගොඩ පොලිසියේ නිලධාරීන් ඔවුන් හා සමීපව කටයුතු කිරීමෙන් පොලිසියේ සේවය කරන කොටසකගේ පී. සී.ආර්. පරීක්ෂණ පැවැත්වීමේදී ආපන ශාලාව පවත්වාගෙන ගිය පුද්ගලයා ද පරීක්ෂාවට ලක් කර ඇති අතර එහිදී ඔහු ආසාදිතයකු බව අනාවරණය වී ඇත.

මෙසේ හදුනාගෙන ඇත්තේ ආඩිඅම්බලම ප්‍රදේශයේ පදිංචිකරුවෙකු බවත් ඔහුගේ පුතා ඇගලුම් ආයතනයේ සේවය කර කොරෝනා ආසාදිතයකු බව හෙළිවී තිබියදීත් ආපන ශාලවේ කටයුතු පවත්වාගෙන ගොස් ඇතැයි ද අනාවරණය වී ඇත.

මිනුවන්ගොඩ පොලිසියේ මෙන්ම ඇදිරිනීතිය හේතුවෙන් වාර්තා කළ වෙනත් පොලිස් ස්ථානයන්ට අයත් පිරිස්ද  ආපන ශාලාව ප්‍රයෝජනයට ගෙන ඇතැයි ද හෙළි වී තිබේ.