(අමදෝරු අමරජීව)
 

 ත්‍රිකුණාමලය දිස්ත්‍රික් පාර්ලිමේන්තු මන්ත්‍රී සුසන්ත පුංචිනිලමේ මහතාට කැත්තකින් පහරදිමට තැත් කළ බව කියන පුද්ගලයෙකු අග්බෝපුර පොලිස් වසමට අයත් අග්බෝගම ප්‍රදේශයේදී අත්අඩංගුවට ගත්බව පොලිසිය කියයි.

 
මන්ත්‍රිවරයා රැගත් වාහනය එළුවන් සමූහයක් මැදින් ධාවනය වීමෙන් එළුවන් කුලප්පුවීම නිසා කෝපයට පත් එළුවන් දක්කාගෙන ගිය පුද්ගලයා  බීමත්ව   පහරදීමට තැත්කර ඇති බව මන්ත්‍රීවරයා  පොලිසියට කළ පැමිණිල්ලේ සඳහන් වේ.

 
අත්අඩංගුවට ගත් පුද්ගලයා පැවසුවේ මන්ත්‍රීවරයා සමඟ පැමිණි පිරිසක් තමන්ට පහරදුන් බවත් ඒ හේතුවෙන් තුවාල ලබා කන්තලේ රෝහලට ඇතුළත්ව ප්‍රතිකාර ගනිද්දී පොලිසියෙන් පැමිණ අත්අඩංගුවටගත් බවත් ය.

 
මේ සම්බන්ධයෙන් කළ විමසුමකට පිළිතුරු දුන් පාර්ලිමේන්තු මන්ත්‍රි සුසන්ත පුංචිනිලමේ මහතා එම පහරදීම ප්‍රතික්ෂේප කරමින් පැවසුවේ කැත්තක් රැගෙන තමන්ට පහරදීමට පැමිණි පුද්ගලයා  තම ආරක්ෂක නිලධාරීන් විසින් මෙල්ල කළ බවය.

 
ඊයේ (20) පස්වරුවේ අත්අඩංගුවට ගත් මෙම පුද්ගලයා කන්තලේ මහේස්ත්‍රාත්අධිකරණයට ඉදිරිපත් කිරීමට නියමිතය.

 
අග්බෝගම පොලිසිය වැඩිදුර පරීක්ෂණ පවත්වයි.