(සුජිත් හේවාජුලිගේ )

ප්‍රචණ්ඩකාරීන්  විසින් සිය නිවාස  ගිනි තබා විනාශ කරනු ලැබීම සම්බන්ධයෙන්  පාර්ලිමේන්තු මන්ත්‍රීවරුන්  සියයකට ආසන්න පිරිසක් ශ්‍රී  ලංකා  මානව හිමිකම් කොමිෂන් සභාවට  පැමිණිලි කර ඇතත් ඒ පැමිණිලි සම්බන්ධයෙන්  කොමිසම මෙතෙක් හරියාකාරව ක්‍රියාත්මකවී නැතැයි ශ්‍රී ලංකා  පොදුජන පෙරමුණේ මාතලේ දිස්ත්‍රික්  පාර්ලිමේන්තු මන්ත්‍රී ප්‍රමිත බණ්ඩාර  තෙන්නකෝන් මහතා චෝදනා කළේය.

කොමිසම ඒ සම්බන්ධයෙන්  මන්ත්‍රීවරුන්ගෙන් කරුණු විමසීමක් කර  හෝ දැනුවත් කර හෝ  නැතැයිද ඔහු  සදහන් කළේය.

ඒ ගැන තමා කනගාටු වන බව පැවසූ  තෙන්නකෝන් මහතා  කොමිසම  පක්ෂග්‍රාහීව කටයුතු කරන  ආකාරයක් පෙනෙන්නට ඇතැයිද  ප්‍රකාශ කළේය.

දිවයින පුරා පසුගිය මැයි මස නව වෙනිදා  සිදුවූ ප්‍රචණ්ඩ ක්‍රියාවලින් පාර්ලිමේන්තු මන්ත්‍රීවරුන්  සියයකට ආසන්න  පිරිසකගේ නිවාස  ඇතුළු දේපළ  රැසකට හානි සිදුවිය.