(සුජිත් හේවාජුලිගේ සහ  අංජුල මහික වීරරත්න)

යෝජිත නව මැතිවරණ ක්‍රමය සම්බන්ධයෙන්  විශේෂඥයන්ගේ  අදහස්  තවදුරටත් ලබාගැනීමට   මැතිවරණ නීති ප්‍රතිසංස්කරණය  සඳහා පත් කෙරුණු පාර්ලිමේන්තු විශේෂ කාරක සභාව තීරණය කළේය.

එම විශේෂඥ කමිටු සාමාජිකයන්ගේ අදහස් ලබාගෙන කමිටුව  ලබන අප්‍රේල් මස 7 වැනිදා නැවතත් රැස්වීමටද එහිදී තීරණය කර ඇත.

මැතිවරණ නීති ප්‍රතිසංස්කරණය සඳහා පත් කෙරුණු පාර්ලිමේන්තු විශේෂ කාරක සභාව එහි සභාපති සභානායක දිනේෂ් ගුණවර්ධන  මහතාගේ ප්‍රධානත්වයෙන්  පාර්ලිමේන්තු සංකීර්ණයේදී රැස්විය.

මෙම රැස්වීමට දේශපාලන පක්ෂ ගණනාවක් නියෝජනය කරමින් සාමාජිකයෝ සහභාගී වූහ. එහිදී අදහස් දැක්වූ  සාමාජිකයන් බහුතරයකගේ අදහස වූයේ යෝජිත මැතිවරණ ක්‍රමය සම්බන්ධයෙන් විශේෂඥයන්ගේ අදහස් තවදුරටත් ලබාගත යුතු බවයි .

එම විශේෂඥ කමිටුව පත්කරනු ලැබුවේ පාර්ලිමේන්තු මැතිවරණ කමිටුව සඳහා උපදෙස් ලබා ගැනීමටය.

මේ අතර  මැතිවරණ නීති ප්‍රතිසංස්කරණය සඳහා පත් කෙරුණු  පාර්ලිමේන්තු විශේෂ කාරක සභාවේ කටයුතු මේ වනවිට අවසන් අදියරට පැමිණ ඇතැයි  පාර්ලිමේන්තු ආරංචි මාර්ග සඳහන් කරයි.

කමිටුවේ වාර්තාව ඉතාම කෙටි කලකින් පාර්ලිමේන්තුවට ඉදිරිපත් කිරීමට නියමිතය.

මෙම සාකච්ඡාවට  අමාත්‍ය  නිමල් සිරිපාල ද සිල්වා, පාර්ලිමේන්තු මන්ත්‍රීවරුන්වන  අනුර කුමාර දිසානායක, රංජිත් මද්දුමබණ්ඩාර,  විමල් වීරවංශ,  රවුෆ් හකීම්,  කබීර් හෂීම්, එම්.ඒ. සුමන්තිරන්,  මනෝ ගනේෂන්,  මධුර විතානගේ යන මහත්වරුන්  සහ  විශේෂ කාරක සභාවේ ලේකම්, පාර්ලිමේන්තුවේ වැඩබලන මහ ලේකම් කුෂානි රෝහණදීර මහත්මිය ඇතුළු පිරිසක්ද සහභාගි වූහ.