(බන්දු තඹවිට)

මතුගම ප්‍රාදේශීය සභාවේ සභාපතිවරයා  පහරදුන්නැයි කියමින්  මතුගම ප්‍රාදේශීය සභාවේ ලේකම්වරිය මතුගම වෑත්තෑව රෝහලට ඇතුළත්ව සිටින්නීය.

ඒ සම්බන්ධයෙන් ඇය  මතුගම පොලිසියට පැමිණිල්ලක් ඉදිරිපත් කර ඇත.

මතුගම ප්‍රාදේශීය සභාවේ කාර්යාලයේ රාජකාරියේ නිරතව සිටියදී සභාපතිවරයා පැමිණ   බැන තර්ජනය කර  මේසයේ ලිපි සුළගේ නොයාමට තබන බර රඳවනයක් මගින් මේසය මතට වේගයෙන් පහර දීම නිසා එය තමාගේ දකුණු උරහිසේ වැදුණු බවට පැමිණිලි කර ඇත.

මේ පිළිබඳව මතුගම ප්‍රාදේශීය සභාවේ සභාපති කසුන් මුණසිංහ මහතා මෙසේ පැවසීය.

මෙම ලේකම්වරිය මා සභාවට පත්වූ දින සිට ප්‍රදේශයේ සංවර්ධන කටයුතු සිදුකිරීමට සහය නොදී අකුල් හෙලනවා. මේ පිළිබඳව මා බස්නාහිර පලාත්පාලන කොමසාරිස්වරියටත් පැමිණිලි කර තිබෙනවා. ඒ අතර අප සභාවේ මන්ත්‍රීවරුන් විසින් පසුගිය සැප්තැම්බර් මාසයේ මහා සභාවේදී සම්මත කරගත් රුපියල් කෝටි 2 කට ආසන්න මුදලකින් සංවර්ධනය කිරීමට නියමිත මාර්ග රාශියක වැඩ වසර අවසාන වනවිටත් සිදුකර නොමැති නිසා පසුගිය 29 වැනි දා බස්නාහිර පළාත් පළාත් පාලන ලේකම් කාර්යාලයට දැනුම් දීමෙන් අනතුරුව එම කාර්යාලය මගින් සභාවට සහ අදාල නිලධාරීන්ට දැනුම් දුන්නා  මාර්ග සංවර්ධනය කිරීමේ කටයුතු අද දින (30) ආරම්භ කරන ලෙස.

නමුත් අද උදැසන 9.30 වන විටත් ඒ සඳහා අවශ්‍ය පියවර ලේකම්වරිය විසින් ගෙන තිබුණේ නෑ. මම ලේකම්ගේ කාර්යාලයට ගොස් ඒ පිළිබඳව විමසීමක් කළා. එවිට ඇය මාවෙත දෝශාරෝපනය කරමින් මට පාරවල් හැදුවත් එකයි ,නැතත් එකයි. මම වැඩ කරන්නේ මට ඕනේ විදිහටයි. ඔයාට ඕනෙ දෙයක් කරගන්න කියලා පැවසුවා.