(අංජුල මහික වීරරත්න)

රටේ වැඩ කරන දේශපාලනඥයාට වඩා බොරු කියන පච කියන දේශපාලනඥයන්ට තැනක් තියෙන බව  විපක්ෂ නායක සජිත් ප්‍රේමදාස මහතා පැවසීය.

ලංකාව දැවැන්ත ආර්ථීක උවදුරකට මුහුණ දෙමින් සිටින බව පැවසූ විපක්ෂ නායකවරයා අද වන විට නිවසේ ආර්ථිකය කඩා වැටී  දශලක්ෂ ගණනකගේ ජන ජීවිත මහපොළවට ඇද වැටෙමින් තිබෙන්නේ යැයි කීය.

විපක්ෂ නායක සජිත් ප්‍රේමදාස මහතා මේ බව කීවේ හම්බන්තොට දිස්ත්‍රික්කයේ කටුවන හඳුගල විජයාරාමයේ අභිනවයෙන් ඉදිකරන ලද වාහල්කඩ විවෘත කිරීමේ උත්සවයේදීය.

රට දැවැන්ත ආර්ථීක උවදුරකට මුහුණ දෙමින් විදේශ සංචිත පවා අඩුවෙමින් යන බව කී විපක්ෂ නායකවරයා  අපනයන ක්ෂේත්‍රය පවා දියුණු වීමේ වේගය අඩු වීම නිසා එදා ආරම්භ කළ ඇගලුම් කර්මාන්තශාලා  වැසී යන බව සඳහන් කළේය. 

මේ නිසා තරුණ තරුණියන්ගේ රැකියා අහිමි වීමේ අවදානමක් මතුව ඇති බවත් මෙයට ඇති ප්‍රධානම හේතුව ආයෝජක හිතකර පරිසරයක් රටේ නැති වීම බවත් ප්‍රේමදාස මහතා කීය.

දැන් රටට ලැබිය යුතු සෘජු විදේශ ආයෝජන පවා රටට අහිමි වෙමින් පවතින්නේ යැයි ද විපක්ෂ නායක සජිත් ප්‍රේමදාස මහතා පැවසීය.