(සුමිත් පොතුපිටිය)

මම පාළම යට බෝට්ටුවක් උඩ ඉදගෙන දවල් ආහාරය ගනිමින් හිටියා. අම්මේ අම්මේ කියල පොඩි දරුවෙක් පාලම උඩ ඉදන් කෑ ගැහනව ඇහුනා. ගඟ දිහා බලනකොට කාන්තාවක් ගඟට වැටිලා ගසාගෙන යනවා. මම කැම එක පැත්තකට විසිකරල ගඟට පැන්නා යැයි බේරුවල පාදාගොඩ පදිංචි චතුරංග සදරුවන් මහතා පැවසීය .

සැමියා සමග ඇති කර ගත් ආරවුලකින් පසු දරුවන් දෙදෙනා බෙන්තර පාලම මත තබා අඩි 40ක් පමණ ගැඹුරු බෙන්තර ගඟට පැන්න දෙදරු මව බේරාගත් අභිත තරුණයා අප සමග එසේ පැවැසුවේය.

අලුත්ගම රිවර් ඇඩ්වෙන්චර් වෝටර් ස්පෝර්ට් ඇන්ඩ් ඩයිව් සෙන්ටර් හී බෝට්ටු ක්‍රියාකරුවකු ලෙසින් සේවය කරන චතුරංග සංචාරකයන්ට බෙන්තර ගගේ සුන්දරත්වය නැරඹීමට අවස්ථාව සලසන තරුණයෙකි.

සිය ආදරණීය දියණිය සහ පුතා පලම මත තබා බෙන්තර ගඟට පැන දිවි නසා ගැනීමට උත්සාහ කළ 33 හැවිරිදි දෙදරුමවගේ දිවිගලවා ගැනීමට සමත් වූයේ ඔහුය.

තමා මුහුණ දුන් ඒ ත්‍රාසජනක සිද්ධියේ අත්දැකීම් කියා පාමින් සඳරුවන් නැවත හඩ අවධි කළේය.

ගඟට වැටී පාවි යන කාන්තාව පසුපස මා පිහිනා ගියා. ඇය ළගට යනවිට රළ පහරට හසුව ඇය නොපෙනී ගියා. යළි එක්වරම ඇය උඩට එනවිට අතින් අල්ලා ගොඩට පිහිනුවා.

ගඟෙන් ගොඩට ගත් ඇය 1990 සුවසැරියෙන් බෙන්තර ප්‍රාදේශීය රෝහලට රැගෙන ගියා. පසුව ඇය වැඩිදුර ප්‍රතිකාර සඳහා බළපිටිය මුලික රෝහලට ඇතුළත් කළ බව දැනගන්න ලැබුණා.

බලංගොඩ කලපේඩිගම, වැලිපතයාය ලිපිනයේ පදිංචි මෙම දෙදරු මව ඌරගස්මංහන්දිය පදිංචි කාන්තාවක්. ඌරගස්මංහන්දිය, බෙලිගස්වේල්ල, ජෝන්කඩය ප්‍රදේශයෙන් විවාහවී සිටින ඇය සැමියා සමග නිතර නිතර ආරවුල් පැවැතියේ. බලංගොඩ අධිකරණයේ දික්කසාද නඩුවක් පවතින බව පොලිසිය සදහන් කරයි.

දෙදෙනාට සමායෙන් සිටින ලෙස අධිකරණයේ ලබදී ඇති උපදෙස් පරිදි චතුරාණී දරු දෙදෙනා සමග ඌරගස්මංහන්දියට යාමට පැමිණ ඇති අතර , ස්වාමි පුරුෂයා එයට විරෝධය පෑම නිසා ඇය දරු දෙදෙනා පාළම අසල පදික වේදිකාව මත තබා අලුත්ගම දෙස සිට ගාල්ල දෙසට ඇති පළමු පාළමේ වම්පසින් අඩි 40 ක් පමණ උසක සිට ජලයට පැනීමට තීරණය කර ඇත්තේ කළ හැකි වෙනත් දෙයක් නොමැති නිසාය.

"පුතේ මම ගඟට පැන්නට පස්සේ ඔයා නංගිවත් අරගෙන ගඟට පනින්න" යැයි අම්මා කියූ බව නම හැවිරිදි පුතා සදහන් කරයි.

දිවිනසා ගැනීමට උත්සාහ කළ කාන්තාවගේ සීයා සහ සොහොයුරකු අද අලුත්ගම පොලිසිට පැමිණ ඇති අතර දරු දෙදෙනා භාරගැනීම ඔවුන් කැමැත්ත පළ කර ඇතැයි ද සදහන් වේ.

මව ගඟට පැනීම නිසා පාලම මත තනිවූ දරු දෙදෙනා ආරක්ෂිත ආකාරයට අලුත්ගම පොලිසිය රැගෙන ඒමට එහි ස්ථානාධිපති හා කාන්තා පොලිස් කාර්යංහය කටයුතු කළේය. අනතුරුව ඔවුනට අවශ්‍ය ආහාර පාන ලබාදී දුන්නේය. මාස එක හමාරක් වයසැති සිඟිත්තිය පොලිස් මව්වරු තුරුළේ නැළෙවෙන අයුරු දුටු කාගෙත් නෙතට කඳුළක් එක්කරන්නක් විය. 

අලුත්ගම ස්ථානාධිපති ප්‍රධාන පොලිස් පරීක්ෂක ඒ.එම්. ප්‍රියන්ක කුමාර ළමා හා කාන්තා කාර්යාංශයේ ස්ථානාධිපතිනි උප පොලිස් පරීක්ෂක නිරෝෂනීගේ ප්‍රධානත්වයෙන් පරීක්ෂණ පවත්වති.