(අංජුල මහික වීරරත්න)

බදු දැලෙන් රිංගා භාණ්ඩ ආනයනය කරන සංවිධානාත්මක කණ්ඩායම්වලට එරෙහිව තදින් නීතිය ක්‍රියාත්මක කරන බව කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා පැවැසීය.

ඔටෝ මොබයිල් සහ විද්‍යුත් උපකරණ කර්මාන්ත සම්බන්ධයෙන් පූර්ව අයවැය සාකච්ඡාවකදී  ආචාර්ය අනිල් ජයන්ත ප්‍රනාන්දු මහතා මේ බව කීය. ජනාධිපති ලේකම් කාර්යාලයේදී මෙය පැවැත්විණි.

ජනාධිපති අනුර කුමාර දිසානායක මහතා ප්‍රමුඛ රජය ගෙන යන ආර්ථික  සංවර්ධන වැඩපිළිවෙළ සඳහා ඔටෝ මොබයිල් සහ විද්‍යුත් උපකරණ ආනයනකරුවෝ සිය පූර්ණ සහාය ලබා දෙන බව මෙහිදී කියා සිටියහ.

වත්මන් ආණ්ඩුව විසින් වාහන ආනයනය සම්බන්ධයෙන් ගනු ලැබූ තීරණය හේතුවෙන් වාහන ආනයන ක්ෂේත්‍රය පුළුල් වූ බව සඳහන් කළ වාහන ආනයනකරුවෝ ඉදිරි අයවැය සඳහා ඵලදායි යෝජනා කිහිපයක්ද මෙහිදී ඉදිරිපත් කළහ.

විද්‍යුත් උපකරණ ආශ්‍රිත  නිෂ්පාදන ආනයනකරුවන් ක්ෂේත්‍රයේ මුහුණ දෙන ගැටලු පිළිබඳවද මෙහිදී සාකච්ඡා කෙරුණු අතර, විශේෂයෙන් සංවිධානාත්මක කණ්ඩායම් විසින් බදු ගෙවීමකින් තොරව හොර රහසේ  මෙරටට ගෙන එනු ලබන විද්‍යුත් උපකරණ හේතුවෙන් වෙළඳපොළ අසමතුලිතතාවක් මෙන්ම, භාණ්ඩවල ගුණාත්මකභාවයේ අඩුවක් දක්නට ලැබෙන බවද විද්‍යුත් උපකරණ ආනයනකරුවෝ මෙහිදී පෙන්වා දුන්හ.

එමඟින් රජයට විශාල බදු  ආදායමක් අහිමි වන බවත්, පාරිභෝගිකයින්ට භාණ්ඩවල ප්‍රමිතිය පිළිබඳ ගැටලු මතුව ඇති බවත් පෙන්වා දුන් ඔවුහු මේ පිළිබඳ කඩිනම් ක්‍රියාමාර්ග ගන්නා ලෙසද  ඉල්ලා සිටියහ.

ක්ෂේත්‍රයේ ප්‍රවීණයන් විසින් ලබා දුන් සියලු ඵලදායි යෝජනා ඉදිරි අයවැය සකස් කිරීමේදී යොදා ගන්නා බවත්,  ප්‍රමිතියෙන් යුතු ගුණාත්මක භාණ්ඩ ආනයනය කිරිම සදහා අවශ්‍ය නම් නව නීති ගෙන ඒමට කටයුතු කරන බවත්, කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා මෙහිදී සඳහන් කළේය.

ජනාධිපති ජ්‍යෙෂ්ඨ අතිරේක ලේකම් කපිල ජනක බණ්ඩාර, අපනයන සංවර්ධන මණ්ඩලයේ සභාපති මංගල විජේසිංහ යන මහත්වරු, මුදල් අමාත්‍යාංශ නිලධාරීහු සහ ඔටෝ මොබයිල් සහ විද්‍යුත් උපකරණ ආනයන කර්මාන්තයට සම්බන්ධ නියෝජිතයෝ මෙම අවස්ථාවට එක්ව සිටියහ.