(අංජුල මහික වීරරත්න සහ සුනිමල් හේවගේ)

අරගලකරුවන් විසින් ගම්පහ නිට්ටඹුවේදී හිටපු පාර්ලිමේන්තු මන්ත්‍රී අමරකීර්ති අතුකෝරල මහතා ඝාතනය කිරීමේ සිද්ධිය සම්බන්ධයෙන් ගම්පහ පුරවැසියකු ලෙස තමන් පොළොන්නරුව ජනතාවගෙන් සමාව අයදින බව නාගරික සංවර්ධන හා නිවාස අමාත්‍ය ප්‍රසන්න රණතුංග මහතා පවසයි.

ඊනියා අරගලකරුවන්ට අවශ්‍ය වූයේ මිනී මරා ගෙවල් ගිනි තබා බලය අල්ලා ගැනීම බවද අමාත්‍යවරයා අවධාරණය කළේය.

අරගලයේ නාමයෙන් මිනිමැරූ, දේපල ගිනි තැබීම් සහ පහර දීම් වැනි සිද්ධීන් වලට සම්බන්ධ වූ සහ ඒ සඳහා අනුබල දුන් සියළු දෙනාට එරෙහිව දැඩි ලෙස නීතිය ක්‍රියාත්මක කළ යුතු බවද ඇමතිවරයා කීවේය.

අමාත්‍යවරයා මේ බව සදහන් කළේ පොළොන්නරුව, හිගුරක්ගොඩ තාරුකා මණ්ඩප ශ්‍රවණාගාරයේ පැවති සින්නක්කර ඉඩම් ඔප්පු ප්‍රදානය කිරීමේ උත්සවයට  සහභාගී වෙමිනි. 

මෙහිදී හිගුරක්ගොඩ ප්‍රාදේශීය ලේකම් කාර්යාලය විසින් ප්‍රතිලාභීන් 197 කට ඉඩම් බලපත්‍ර සහ ප්‍රතිලාභීන් 43 කට ඉඩම් දීමනා පත්‍ර පිරිනැමිණි. 

ජාතික නිවාස සංවර්ධන අධිකාරිය විසින් පොළොන්නරුව සී.අයි.සී. නිවාස යෝජනා ක්‍රමයේ නිවාසලාභීන් 86 දෙනකුට සින්නක්කර ඉඩම් ඔප්පු සහ ප්‍රතිලාභීන් 12 දෙනකුට “ඔබට ගෙයක් - රටට හෙටක්” නිවාස වැඩසටහන යටතේ රුපියල් මිලියන 2.3 ක් වටිනා නිවාස ආධාරද පිරිනැමිණි.