(සුජිත් හේවාජුලිගේ)

පාර්ලිමේන්තුවේ නිලධාරී නිලධාරිනියන් තිහකට ආසන්න පිරිසක් මෑත භාගයේදී එම සේවයෙන් ඉවත්ව වෙනත් රැකියා සඳහා පිටව ගොස් ඇතැයි වාර්තාවේ.

මෙසේ ඉවත්ව ගොස් ඇතැයි පැවසෙන්නේ පාලන, සැපයුම්,  මූල්‍ය සහ  හැන්සාඩ් යනාදී අංශවල නිලධාරී නිලධාරිනියන් පිරිසකි.

ඉවත්ව ගොස් ඇති  වැඩි පිරිසක් උපාධිධාරීහු වෙති.

පසුගිය සතියේදීද  නිලධාරීන් කිහිප දෙනෙකු පාර්ලිමේන්තු සේවයෙන් වෙනත් සේවාවන්ට ඉවත්ව ගිය බව පාර්ලිමේන්තු ආරංචි මාර්ග සඳහන් කළේය.

පාර්ලිමේන්තු නිලධාරී නිලධාරිනියන් වැඩි පිරිසක් ඉවත්ව ගොස් ඇතැයි පැවසෙන්නේ පෞද්ගලික අංශය සඳහාය.

ආරංචි මාර්ග සඳහන් කරන අන්දමට ඉතා කෙටි කාලයකදී  මෙතරම් විශාල ප්‍රමාණයක් පාර්ලිමේන්තු සේවයෙන් ඉවත්ව ගිය පළමු අවස්ථාව මෙයයි.

පාර්ලිමේන්තුවේ සේවක සේවිකාවන්ට මෙතෙක් හිමිව තිබූ නිවාඩු හිලව් දීමනාව( Leaveencashment) සහ වෙනත් දීමනා සහ  වරප්‍රසාද අහිමි වීම සේවය හැර යෑමට ප්‍රධාන හේතුවක්ව තිබෙන බව එම ආරංචි මාර්ග වැඩිදුරටත් සඳහන් කළේය.

සේවක සේවිකාවන් රඳවා ගැනීමට මෙතෙක් විධිමත් වැඩපිළිවෙළක් ක්‍රියාත්මක කර නැතැයි ඔවුහු චෝදනා කරති.

මේ සම්බන්ධයෙන් අප පාර්ලිමේන්තු ප්‍රධානියෙකුගෙන් කළ විමසුමකදී ඔහු පැවසුවේ රජය ගත් ප්‍රතිපත්තිමය තීරණයක් මත නිවාඩු හිලව් දීමනාව  නතර කෙරුණු බවයි.