(අංජුල මහික වීරරත්න)

තෝරාගත් ප්‍රධාන වැව් වලට අයත් සීමාවන් සහ සංරක්ෂිත ප්‍රදේශ ආරක්ෂා කිරීමේ වැඩ සටහන සඳහා කැබිනට් අනුමැතිය ලැබී ඇත.

නාගරීකරණය, ජනාවාස ව්‍යාප්ත වීම සහ නව කර්මාන්ත ස්ථාපිත වීම වැනි නොයෙකුත් කාර්යයන් වැව් ආසන්නයේ පිහිටි ඉඩම් වල සිදු වීම හේතුවෙන් එම ප්‍රදේශ වල විවිධ භූමි පරිභෝජන රටාවන් ව්‍යාප්ත වීමේ ප්‍රවණතාවක් දක්නට ලැබේ.

 භූ පරිභෝජන රටාවන් වෙනස්වීම හේතුවෙන් මේ වන විටත් විවිධ බලපෑම් වලට ලක්ව ඇති සහ එවැනි බලපෑම් වලට ලක්වීමේ නැඹුරුවක් ඇතැයි හඳුනාගත හැකි වාරිමාර්ග දෙපාර්තමේන්තුව යටතේ පාලනය වන ප්‍රධාන වැව්වල සීමාවන් ඕනෑම පුරවැසියෙකු හෝ පාර්ශ්වයකට පහසුවෙන් හඳුනා ගැනීමට හැකි වන පරිදි වාරිමාර්ග දෙපාර්තමේන්තුවේ මායිම් කණු යොදා නිශ්චිත ලෙස භුමියේ සලකුණු කිරීම කාලීන අවශ්‍යතාවක් ලෙස හඳුනාගනු ලැබ තිබේ. 

ඊට අමතරව, මායිම අතර සුදුසු ගස් වර්ග රෝපණය කර ජෛව වැටියක් සැකසීම යෝග්‍ය බව ද වැඩි දුරටත් හඳුනා ගනු ලැබ ඇත. මෙම කාර්යය සඳහා මිනින්දෝරු දෙපාර්තමේන්තුව, වන ජීවි සංරක්ෂණ දෙපාර්තමේන්තුව, වන සංරක්ෂණ දෙපාර්තමේන්තුව, අදාළ ප්‍රාදේශීය ලේකම්වරුන්, ගොවි සංවිධාන, පරිසර සංවිධාන, සමාජ සංවිධාන සහ පාසල් දරුවන් සුදුසු පරිදි සහභාගී කර ගැනීමට අපේක්ෂා කරනු ලබයි.

ඒ අනුව, "Clean Sri Lanka '' ව්‍යාපෘතිය යටතේ කෘෂිකර්ම, පශු සම්පත්, ඉඩම් සහ වාරි මාර්ග අමාත්‍යාංශයට ලබා දී ඇති රුපියල් මිලියන 100 ක ප්‍රතිපාදන යොදා ගනිමින්, යෝජිත වැඩසටහන ක්‍රියාත්මක කිරීම පිණිස කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.