(සුජිත් හේවාජුලිගේ සහ  අංජුල මහික වීරරත්න)

මෙරට බොහෝ නීති සකස්වී ඇත්තේ  දේශීය කිරි නිෂ්පාදකයා නැංවීමට නොව කිරි පිටි හදන  නවසීලන්තය සතුටු කෙරෙන   ආකාරයට යැයි කෘෂිකර්ම අමාත්‍ය මහින්දානන්ද අලුත්ගමගේ මහතා පාර්ලිමේන්තුවේදී අද පැවසීය.

අමාත්‍යවරයා මෙසේ පැවසූවේ  පරිසර වාර්තා සම්බන්ධයෙන් සංවාදයක් ඇතිවූ අවස්ථාවේදීය.

පරිසර වාර්තා නිකුත් කිරීමේ දී අක්‍රමිකතා වැලැක්වීමට වහාම  පියවර ගතයුතු බව  අමාත්‍ය මහින්දානන්ද අලුත්ගමගේ මහතා මෙහිදී පැවසුවේය.

මෙය පරිසර අමාත්‍යවරයාගේ ප්‍රශ්නයක් නොවන බවත්  පරිසර වාර්තා නිකුත් කිරීමේදී  සාධාරණ මුදලක්  අය කරන්නැයි  තමා ඉල්ලීමක් කරන බවත් ඔහු කීවේය.

සත්ව නිෂ්පාදන දෙපාර්තමේන්තුව සත්ව ගොවිපොළවල්  පහක් සඳහා ටෙන්ඩර් පත් කැඳවා ඇතැයි අමාත්‍යවරයා වැඩිදුරටත් පැවසීය.

මෙහිදී අදහස් දැක්වූ පරිසර අමාත්‍ය මහින්ද අමරවීර මහතා පැවසූවේ  එලෙස මුදල් ඉල්ලු ආයතන ගැන පැමිණිල්ලක් ඉදිරිපත් වුවහොත් ඒවා අසාදු ලේඛනයට ඇතුළත් කළ හැකි බවයි.

එසේම මෙවැනි අක්‍රමිකතා වැළැක්වීම සඳහා පරිසර පනත සංශෝධනය කිරීමට කටයුතු කරගෙන යන බවද ඔහු පැවසීය.