(යොහාන් භාසුර)

ජාතික ඉන්ධන බලපත්‍රයට අනුව පොලිස් ස්ථානවල ත්‍රීරෝද රථ ලියාපදිංචි කරන ලෙස බලශක්ති අමාත්‍යංශය කළ දැනුම්දීම සමඟ පොලිස් ස්ථානවලට යන ඇතමුන්ට ත්‍රීරෝද රථයේ ලියාපදිංචි අයිතිය නොමැතිවීම නිසා දැඩි අපහසුතාවට පත්ව ඇති බව වාර්තා වේ.

ත්‍රීරෝද රථ රියදුරන් පවසන්නේ ත්‍රීරෝද රථවලින් සියයට 10 ක් පමණ වර්තමාන අයිතිකරු ලියාපදිංචි අයිතිකරු නොවන බවත් මෙම නව ඉන්ධන ලියාපදිංචිය හේතුවෙන් අයිතිකරු මාරු කිරීමට ද මුදලක් වැයකිරීමට සිදුව ඇති බවත්ය.

ඉන්ධන ලබාගැනීම සඳහා ත්‍රීරෝද රථයේ ලියාපදිංචි හිමිකරු ආසන්නතම පොලිස් ස්ථානයේ ලියාපදිංචි වියයුතු බවත් එක් පොලිස් ස්ථානයක ත්‍රීරෝද රථ 250 ක් පමණක් ලියාපදිංචි කරන බවත් පොලිසිය පවසයි.

ත්‍රීරෝද රථ රියදුරන් අද (27) පෙරවරුවේ සිට ලියාපදිංචිවීම සඳහා පොලිස් ස්ථානවලට පැමිණෙමින් සිටින අතර කොළඹ නගරයේ පොලිස් ස්ථානවල තදබදයක් ද පැවතුණි.

කොළඹ කෙසෙල්වත්ත පොලිස් ස්ථානයේ ත්‍රීරෝද රථ ලියාපදිංචි කළ ආකාරය ඡායාරූපවල දැක්වේ.

(ඡායාරූප: ශාන්ත රත්නායක)