(නිමල කොඩිතුවක්කු)

ඩීසල් නොමැතිවීම හේතුවෙන් පොදු ප්‍රවාහන සේවයට අද (02) දිනයේ දැඩි බලපෑම් එල්ල වී තිබිණි.

පෞද්ගලික බස් රථ ධාවනය තවදුරටත් සීමාවෙමින්  දිවයිනපුරා පෞද්ගලික බස්රථ 4500 ක් පමණක් ධාවනය වූ බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පැවසීය.

ශ්‍රී ලංකා ගමනා ගමන මණ්ඩලයේ ඩිපෝ මගින් පෞද්ගලික බස් රථ  සඳහා ඉන්ධන නිකුත් කරන බවට ප්‍රවාහන රාජ්‍ය අමාත්‍යවරයා ප්‍රකාශ කළත් එසේ ඉන්ධන නොලැබුණ බවත් හෙතෙම කීවේය.

ඉන්ධන නොමැති වීමෙන් මගීන් සමග බස් රථ අතරමග නතරවීමේ අවස්ථා සහ බස් රථය එක් ගමනාන්තයකට පැමිණ අනෙක් ගමනාන්තය සඳහා යාමට නොහැකි වූ අවස්ථාවන් විශාල ප්‍රමාණයක් අද (02) දිනයේ වාර්තා වූ බවද හෙතෙම පැවසීය.

ඇතැම් බස් රථ වලට මගීන් සමග පැය ගණන් ඉන්ධන පෝලිම්වල රැඳී සිටීමට සිදුවූ බවත් මේ හේතුවෙන් මගී ජනතාව මෙන්ම බස් රථ හිමියන්ද දැඩි පීඩාවට පත්ව සිටින බවත් ඔහු කීවේය.

බස්රථ රියදුරන් සඳහා දිනකට රුපියල් 2500ක් සහ කොන්දොස්තරවරුන් සඳහා දිනකට රුපියල් 1500 බැගින් වැටුප් ගෙවීමටවත් බස් රථ හිමියන්ට අදාදාම් නොමැති බවත්  හෙතෙම පැවසීය.

ඉන්ධන පිරවුම් හල් වලින් ඉන්ධන ලබා ගැනීමේදී පෞද්ගලික බස් රථ සඳහා ප්‍රමුඛත්වයක් ලබා දෙන ලෙසට පොලිස්පතිවරයාගෙන් ඉල්ලීමක් කළ බවද විජේරත්න මහතා සඳහන් කළේය.

ඉන්ධන හිගය හේතුවෙන් අන්තර් පළාත් පෞද්ගලික බස් රථ ධාවනය වූයේ 1500කට අඩු සංඛ්‍යාවක් බව අන්තර් පළාත් පෞද්ගලික බස් හිමියන්ගේ සංගමයේ සභාපති සරත් විජිත කුමාර මහතා ප්‍රකාශ කළේය.

පෞද්ගලික බස් රථ  සඳහා ශ්‍රී ලංකා ගමනා ගමන මණ්ඩලයේ ඩිපෝ මගින් ඉන්ධන ලබාදීමට කටයුතු කරන බව  ප්‍රවාහන රාජ්‍ය අමාත්‍යවරයා පැවසුවත් ලංගමයෙන් ඉන්ධන නොලැබුන බවත් ඔහු පැවසීය.

ඉන්ධන හිඟයට බලධාරීන් විසදුම් ලබා නොදුනහොත පොදු ප්‍රවාහන සේවා මුලුමනින්ම අඩපන වී මගී ජනතාව  දැඩි අසීරුතාවයට මුහුණදීමට සිදුවනු ඇති බවද ඔහු සඳහන් කලේය.