(අංජුල මහික වීරරත්න සහ ටී.කේ.ජී.කපිල)

ජනාධිපති රනිල් වික්‍රමසිංහ මහතා සිව් දින නිල සංචාරයක් සඳහා ඊජිප්තුව බලා පිටත්ව ගියේය. ඊජිප්තුවේ ෂාම් එල් ෂීක් ( Sharm El Shiek) නුවර අද 06 දා සිට 18 දා පැවැත්වෙන දේශගුණික විපර්යාස පිළිබඳ COP 27 ලෝක සමුළුවේ දේශනයක් පැවැත්වීම ජනාධිපති රනිල් වික්‍රමසිංහ මහතාගේ ඊජිප්තු නිල සංචාරයේ මූලික අරමුණයි.

ලංකාවේ පිහිටුවීමට නියමිත දේශගුණ විපර්යාස පිළිබඳ ලේකම් කාර්යාලය සම්බන්ධයෙන් සහ මෙරට මෙන්ම ලෝක දේශගුණික විපර්යාසයන් සම්බන්ධයෙන්ද ජනාධිපති රනිල් වික්‍රමසිංහ මහතා සිය දේශනයේදී අදහස් දැක්වීමට බලාපොරොත්තු වේ.

ජනාධිපති රනිල් වික්‍රමසිංහ මහතා සිය සිව්දින සංචාරයේදී ඊජිප්තු ජනාධිපති ආබ්දල් ෆැටා එල් සිසි ( Abdel Fattah Sissi) සහ අග්‍රාමාත්‍ය මොස්තාෆා මද්බව්ලි (Modtafa Madbouly) මහත්වරුන් හමු වී සාකච්ඡා පවත්වනු ඇත.

ජනාධිපතිවරයා ඊජිප්තු සංචාරය නිම කර නොවැම්බර් 10 දා යළි දිවයිනට පැමිණීමට නියමිතය. ජනාධිපතිවරයාගේ ඊජිප්තු සංචාරයට දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජයවර්ධන මහතා ද සහභාගී වීමට නියමිතය.