(ඩයනා උදයංගනී සහ සුජිත් හේවාජූලිගේ)

චීන පොහොර නැව වෙනුවෙන් ගෙවිය යුතු ඇමෙරිකානු ඩොලර් මිලියන 6.7 ක මුදල වරද කළ පුද්ගලයන්ගෙන් අය කරගත යුතු බවත්, එය රටක් ලෙස ජනතාව විසින් ගෙවිය යුතු නැති බවත් ශ්‍රී ලංකා නිදහස් පක්‍ෂයේ මහලේකම්, රාජ්‍ය අමාත්‍ය දයාසිරි ජයසේකර මහතා පැවසීය.

රට තුළ දැඩි ඩොලර් අර්බුදයක් පවතින අවස්ථාවක මෙවැනි ගෙවීමක් කරන්නට සිදුවීම රටට විශාල පාඩුවක් බව කී රාජ්‍ය අමාත්‍යවරයා එය වගකිවයුත්තන්ගෙන් අයකරවීම වෙනුවෙන් පක්‍ෂයක් ලෙස කළ හැකි සියල්ල කරන බව ද සඳහන් කළේය.

ආණ්ඩුව කරන හැමදේම හරි කියා පිළිගන්නට සූදානම් නැතැයි කී දයාසිරි ජයසේකර මහතා වැරදි දේ වැරදියි කියන්න බයවෙන්නේත් නැතැයි කීවේය.

පක්‍ෂ මහලේකම්, රාජ්‍ය අමාත්‍ය දයාසිරි ජයසේකර මහතා මේ බව පැවසුවේ පක්‍ෂ මූලස්ථානයේදී අද (15) පැවති රැස්වීමකින් අනතුරුව මාධ්‍ය වෙත අදහස් දක්වමිනි.

පොහොර අර්බුදය නිසා රටට වී ඇති විනාශය අද සියලු දෙනාම අත්දකින බව කී ජයසේකර මහතා කෘෂිකර්ම ඇමතිවරයා ගත් තීන්දුව නිවැරදි වුවත් එය ඉක්මනින් ක්‍රියාත්මක කරන්න ගොස් විනාශයක් සිදුව ඇතැයි පැවසීය.

මේ වන විට වගාවන් සම්පූර්ණ විනාශ වී අසුවනු අඩු වෙමින් ඇති බවත්, නිවැරදිව කළ කාබනික පොහොර වගාවන් පවා මෙයින් විනාශ වන බවත් හෙතෙම සඳහන් කළේය