විනීතා එම් ගමගේ
 
කම්කරු නිලධාරීහු ලබන වසරේ ජනවාරි පළමු වැනිදා සිට කේෂ්ත‍්‍ර රාජකාරි වලින් ඉවත්වීමට තීරණය කළ බව රාජ්‍ය සේවා කම්කරු නිලධාරීන්ගේ සංගමය කියයි. 

ගමන් වියදම් සඳහා ගෙවනු ලබන රුපියල් දස දහසේ දීමනාව මාස කිහිපයකින් නොගෙවීම නිසා මේ තීරණය ගත්  බව රාජ්‍ය සේවා කම්කරු නිලධාරින්ගේ සංගමයේ සභාපති සී අයි ගමගේ මහතා ලංකාදීපයට පැවැසීය. 

බස්නාහිර, වයඹ, සබරගමුව ඇතුළු පළාත් කිහිපයක මෙම දීමනා මාස කිහිපයකින් ගෙවා  නැතැයි පැවසූ ගමගේ මහතා වයඹ පළාතේ ඉකුත් සැප්තැම්බරයේ සිට ගෙවා නැතැයි ද, බස්නාහිර පළාතේ නොවැම්බර් සිට ගෙවා නැතැයි ද කීය. 
දකුණු පළාතේ ඔක්තෝබර් මාසයේ සිට මෙම දීමනාව ගෙවා නැති  බවද සබරගමුව පළාතේ ඉකුත් ඔක්තෝබරයේ සිට ගෙවා නැති බවද කියා සිටියේය. 

මහ බැංකුවෙන් මේ දීමනා සඳහා මුදල් වෙන් කර ඇති නමුත් කම්කරු දෙපාර්තමේන්තුවේ ගිණුම් දුර්වල කළමණාකාරිත්වය මෙම තත්ත්වය ඇති කිරීමට මුල් වී ඇති බවද ගමගේ මහතා පැවැසීය.

සාමාන්‍යයෙන් සිදුවන්නේ කම්කරු නිලධාරින් කේෂ්ත‍්‍ර පරික්ෂණ රාජකාරි සඳහා තම අතින් වියදම් කර පසුව එම දීමනාව ඉල්ලීම බවත් මෙසේ මාස ගණනක් තිස්සේ එම මුදල් නොගෙවීම නිසා බොහෝ නිලධාරින්ට ලබන පාසල් වාරය සඳහා දූ දරුවන්ට පොත්පත් මිලදී ගැනීමට හැකියාව ලැබී නැතැයි ද ඔහු පෙන්වා දුන්නේය. 

මේ නිසා සංගමයේ විධායක සභාව රැස්වී ජනවාරියේ සිට කේෂ්ත‍්‍ර රාජකාරි සීමා කිරීමට තීරණය කළ බවත් ඒ පිළිබඳව සාමාජිකත්වය දැනුවත් කිරීමට කටයුතු කරන බවත් ගමගේ මහතා සඳහන් කළේය.