( තිළිණි ද සිල්වා )

කටුනායක බණ්ඩාරනායක ගුවන් තොටුපල පුළුල් කිරීමේ ව්‍යාපෘතියේ දෙවන අදියර ( බී පැකේජය) බ්‍රහස්පතින්දා (25) පෙරවරුවේ සුබ මොහොතින් අග්‍රාමාත්‍ය මහින්ද රාජපක්ෂ මහතා  විසින් විවෘත කරන බව සංචාරක අමාත්‍යාංශය කියා සිටී.

ජපන් - ශ්‍රී ලංකා ඒකාබද්ධ ව්‍යාපෘතියක් වන කටුනායක බණ්ඩාරනායක ගුවන් තොටුපළ පුළුල් කිරීමේ ව්‍යාපෘතියේ බී පැකේජ ව්‍යාපෘතිය සඳහා  වැයකර ඇති මුළුමුදල රුපියල් බිලියන 6.1ක් වන බවද එම අමාත්‍යාංශය පේනවා දේ.

මෙමගින් දැනට මිලියන හයක් වන කටුනායක ගුවන්තොටුපළේ වාර්ෂික මගින් හැසිරවීමේ ධාරිතාවය සමස්ථ ව්‍යාපෘතිය අවසන් කිරීමෙන්  අනතුරුව මගීන් මිලියන පහළොවක් දක්වා ඉහළ නැංවීමට අපේක්ෂිතය.

2014 වසරේ එවකට ජනාධිපති මහින්ද රාජපක්ෂ මහතාගේ සහ ජපානයේ හිටපු අග්‍රාමාත්‍ය ෂින්හුවා අබේ මහතාගේ ප්‍රධානත්වයෙන් කටුනායක බණ්ඩාරනායක ගුවන් තොටුපළ පුළුල් කිරීමේ ව්‍යාපෘතිය ආරම්භ කරනු ලැබීය .

යහපාලන රජය සමයේ අත්හැර දමා තිබූ මෙම ව්‍යාපෘතියේ ඒ පැකේජයේ ඉදිකිරීම් ජනාධිපති ගෝඨාභය රාජපක්ෂ මහතාගේ පත්වීමත් සමගම   සංචාරක හා ගුවන් සේවා අමාත්‍ය ප්‍රසන්න රණතුංග මහතාගේ මැදිහත් වීමෙන් යළි ආරම්භ කිරීම සඳහා කටයුතු කෙරුණ අතර ඉදිකිරීම් මන්දගාමීව සිදුකෙරුණු බී පැකේජයේ ඉදිකිරීම්  කඩිනම් කිරීමටද පියවර ගැණිනි.

නව ව්‍යාපෘතිය සම්පූර්ණයෙන් ඉදිකර අවසන් වනවිට ගුවන් තොටුපලේ ගුවන් යානා නැවැත්වීමේ අංගන  49ක් දක්වා වැඩිවන අතර එමගින් දැනට පවතින ගුවන් යානා නැවැත්වීමේ පහසුකම් දෙගුණයක් වනු ඇත .

බී පැකේජය යටතේ දුරස්ථ අංඟනය නිම කිරීමෙන් අනතුරුව දැනට පවත්නා අංගනය වර්ග මීටර් 269000 සිට වර්ග මීටර් 479000ක්  දක්වා  පුළුල්  වී අපේක්ෂිත ඉල්ලුමට සහ ගුවන් යානා මෙහෙයුම් වළට ඉහල පහසුකම් සැලසෙන බවද සංචාරක අමාත්‍යාංශය කියා සිටී.

රුපියල් බිලියන 100 ක වියදමින් සිදු කෙරෙන කටුනායක බණ්ඩාරනායක ගුවන් තොටුපළ පුළුල් කිරීමේ සමස්ථ ව්‍යාපෘතිය අවසන් වන විට  පිරික්සුම් කවුළු  53 සිට 149 ක් දක්වා වැඩිවන අතර විගමන කවුළු සංඛයාව  21 සිට 53 ක් දක්වාත් ආගමන කවුළු සංඛ්‍යාව 27 සිට 83ක් දක්වාත්  වැඩි කෙරේ.

නව ව්‍යාපෘතිය යටතේ ගුවන්තොටුපළේ ඇතිවන හදිසි ගංවතුර ඵලදායි ලෙස පාලනය කළ හැකි වන පරිදි ඉදිකර ඇති ජල රැඳවුම් පොකුණු මගින්  භූගත ජලය  ස්ථානගත කිරීමට පියවර ගෙන ඇත.