(රන්ජන් කටුගම්පොළ සහ විමුක්ති එස් රුද්‍රිගු)

අධ්‍යාපන පොදු සහතික පත්‍ර උසස් පෙළ විභාගය පැවැත්වෙන කාලය තුළ අඛණ්ඩව විදුලිය සැපයීමට බල කරමින් ලංකා විදුලිබල මණ්ඩලයට රිට් ආඥාවක් නිකුත් කරන ලෙස ඉල්ලමින් මහජන උපයෝගීතා කොමිසම අභියාචනාධිකරණයේ ගොනුකළ රිට් පෙත්සම විභාගයට ගැනීම අභියාචනාධිකරණය ප්‍රතික්ෂේප කළේය.

මෙහිදී මහජන උපයෝගීතා කොමිසමේ සභාපති ජනක රත්නායක මහතා කටයුතු කරන ආකාරය පිළිබඳව අභියාචනාධිකරණය දෝෂ දර්ශනයට ලක් කළේය.

උපයෝගීතා කොමිසමේ සාමාජිකයන් දෙදෙනෙකු විරුද්ධ වී සිටියදී සභාපතිවරයා තනි මතයට කටයුතු කර ඇති බවත් ඒ අනුව කටයුතු කළහොත් ඉදිරියේදී අධ්‍යාපන පොදු සහතික පත්‍ර උසස් පෙළ විභාගයට පෙනී සිටින සිසුන් කොහෙත්ම විදුලිය නොමැති වීමේ අවධානමකට ලක්විය හැකි බවත් අභියාචනාධිකරණ විනිසුරු සෝභිත රාජකරුණා මහතා කියා සිටියේය.

ඒ අනුව මෙම පෙත්සමෙහි නඩු ගාස්තු මහජන උපයෝගීතා කොමිසමෙන් අයකර නොගත යුතු බවත් ඒ පිළිබඳ විගණකාධිපතිවරයා වෙත යොමු කරන බවත් අභියාචනාධිකරණ විනිසුරු සෝභිත රාජකරුණා මහතා පැවසුවේය.

මෙම රිට් පෙත්සම සෝභිත රාජකරුණා සහ ධම්මික ගනේපොළ මහත්වරුන්ගෙන් සමන්විත අභියාචනාධිකරණ විනිසුරු මඩුල්ලක් හමුවේ සළකා බැලිණි.