(සුජිත් හේවාජුලිගේ)

ශ්‍රී ලංකා නාවික හමුදාව සහ රක්නා ආරක්ෂක ලංකා සමාගම එක්ව කළ මුහුදු ආරක්ෂණ සේවයට ඇවන්ගාඩ් සමාගම එක්කර ගැනීමෙන් රුපියල් කෝටි ගණනක පාඩුවක් සිදුවීම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාවට සහ අපරාධ පරීක්‍ෂණ දෙපාර්තමේන්තුවට පැමිණිලි කිරීමට පොදු ව්‍යාපාර පිළිබඳ පාර්ලිමේන්තු කාරක සභාව (කෝප් කමිටුව) තීරණය කර ඇත.

මේ සම්බන්ධයෙන් අප කළ විමසුමකදී අදහස් දැක්වූ කෝප් කමිටුවේ සභාපති ෙෙවද්‍ය නිශාන්ත සමරවීර මහතා පැවසුවේ ඒ පිළිබඳ ලියැකියැවිලි එම විමර්ශන ආයතනවලට ළඟදීම බාර දෙන බවයි.

ඇවන්ගාඩ් පෞද්ගලික සමාගම මෙම සේවාවට එක්කර ගැනීමෙන් රජයට විශාල මුදලක් අහිමිවී ඇති බවත් එ් පාඩුව කොපමණදැයි සොයා බලාගෙන යන බවත් ඔහු ප්‍රකාශ කළේය.

නාවික හමුදාව මේ කටයුතුවලින් ඉවත් වුණේ ඇයිදැයි යන්න ගැනද පුලුල්ව කරුණු සොයා බලන බව කෝප් කමිටු සභාපතිවරයා කීවේය.

රක්නා ආරක්ෂක ලංකා සමාගමේ ප්‍රධානීන් කෝප් කමිටුව හමුවට පසුගිය බදාදා කැඳවා මේ ගැන දීර්ඝව සාකච්ඡා කෙරිණ.