(කේ බුද්ධික කුමාරසිරි)

අවිස්සාවේල්ල කරඳන වෑවිල පදිංචි කාන්තාවකට වෙඩි තැබීමට සඳහා යොදාගත් බව කියන ගිනි අවිය ඇතුළු ගිනි අවි 02 ක් සමගින් ජීව අත්බෝම්බයක් , හිස් පතොරම් කොපු සමඟ "මස් වැද්දා" නමින් හදුන්වන සැකකරුවකු සමගින් සැකකරුවන් දෙදෙනකු අත්අඩංගුවට ගත් බව අවිස්සාවේල්ල මූලස්ථාන පොලිසිය පවසයි.

වෑවිල ප්‍රදේශයේ පදිංචි කාන්තාවකගෙන් රුපියල් 50000 ක මුදලක් කප්පම් වශයෙන් ඉල්ලා ඇති එම ප්‍රදේශයේම පදිංචි සැකකරු පසුව අදාල මුදල ලබානොදීම නිසා උරණව එම කාන්තාවට වෙඩි තබා ඇති බව අදාල පැමිණිල්ලේ සදහන් බවද පොලිසිය පැවසීය.

වෙඩි වැදුනු කාන්තාව තුවාල ලබා හොරණ මූලික රෝහලට ඇතුලත් කර ප්‍රතිකාර ලබා පිටව ගොස් ඇති බවද පොලිසිය පවසයි.

අත්අඩංගුවට ගත් සැකකරුවන් දෙදෙනාගෙන් එක් අයකු පහුගිය 21 වෙනි දින අළුයම 66 හැවිරිදි කාන්තාවට වෙඩි තැබූ මස් වැද්දා යන අන්වර්ථ නාමයෙන් හදුන්වන, 39 හැවිරිදි පුද්ගලයකු වන අතර, අනිත් පුද්ගලයා ඔහුගේ ඥාතීයකු බවද පොලිසිය පැවසීය.

එම සැකකරුවන් සතුව තිබී බෝර 12 ගිනි අවි 02 ක්, එම වර්ගයේ ගිනි අවි බටයක් , ජීව අත්බෝමබයක් ජීව පතොරම් 01 ක් , හිස් පතොරම් කොපු 03 ක්ද සොයා ගැනීමට හැකි වූ බවද පොලිසිය පවසයි.