(අංජුල මහික වීරරත්න)

මෙවර සීමාවාසික පුහුණුව අවසන් කළ වෛද්‍යවරුන් 453 දෙනකු අතුරින් 435 දෙනකු හෙවත් මුළු පිරිසෙන් 96%ක් පත්වීම් සඳහා සාර්ථකව අයැදුම් කර ඇතැයි සෞඛ්‍ය අමාත්‍යාංශය පවසයි.

පශ්චාත් සීමාවාසික වෛද්‍ය පත්වීම් සඳහා අයැදුම්පත් කැඳවීමේ කටයුතු සෞඛ්‍ය අමාත්‍යාංශය විසින් නියම කර තිබූ පරිදි අප්‍රේල් 4 මධ්‍යහ්න 12.00 ට අවසන් කෙරිණි.

මෙම වෛද්‍ය නිලධාරීන් පත්වීම් සඳහා ඉල්ලුම් කර ඇති ආකාරය සහ ඔවුන්ගේ කුසලතා ලේඛනය (Merit List) පදනම් කර ගනිමින් නව රෝහල් සහ සෞඛ්‍ය ආයතන වෙත අනුයුක්ත කිරීමේ කටයුතු ඉදිරියේදී සිදු කිරීමට නියමිතය.

විනිවිදභාවයකින් යුත් විද්‍යාත්මක ක්‍රමවේදයක් යටතේ සිදු කෙරෙන මෙම අනුයුක්ත කිරීම් හරහා දිවයින පුරා පවතින වෛද්‍ය අවශ්‍යතාවයන් සපුරාලීමට අමාත්‍යාංශය අපේක්ෂා කරන බව අමාත්‍යංශය කියයි.

තෝරා ගන්නා ලද අයැදුම්කරුවන්ගේ නාමලේඛනය, ඔවුන් අනුයුක්ත කරන ලද සේවා ස්ථාන, සේවයට වාර්තා කළ යුතු දිනය පිළිබඳ විස්තර ඉදිරියේදී කඩිනමින් ප්‍රකාශයට පත් කරනු ඇතැයි සෞඛ්‍ය අමාත්‍යාංශය සඳහන් කරයි.