(බිමල් ශ්‍යාමන් ජයසිංහ)

හැඩරුවින් සමාන සහෝදරයන් දෙදෙනා මාරුවී සිදුවූ බහින් බස් වීමක් අතරතුර තියුණු ආයුධ  ප්‍රහාරයකට ලක් වූ 51 හැවිරදි පුද්ගලයකු මියගොස් ඇති අතර පහරදුන් බව කියන බස්වල සින්දු කියන්නකු අත්අඩංගුවට ගත් බව ග්‍රෑන්ඩ්පාස් පොලිසිය කියයි.

සිද්ධියෙන් ඝාතනයට ලක්ව ඇත්තේ වැල්ලම්පිටිය වෙහෙරගොඩැල්ල ප්‍රදේශයේ පදිංචි මංජුල වසන්ත පුෂ්පකුමාර (51) යන අයයි

මීට සතියකට පමණ ඉහත දී සැකකරු මියලගිය අයගේ බාල සහෝදරයාට කැසට් යන්ත්‍රයක් උකස්කර රුපියල් පන්සීයක් ලබාගෙන තිබූ බව පොලිසිය සඳහන් කරයි.

එය බේරා ගැනීම සඳහා පැමිණි අවස්ථාවේදී එකම හැඩරුවින් යුත් අයියා පමණක් නිවසේ සිට ඇති අතර ඒ පිළිබඳව නොදැන සිටී සැකකරු සිය උකස් තබන ලද කැසට් යන්ත්‍රය යන්ත්‍රය ලබාදෙන ලෙස පවසා රුපියල් 500 එම පුද්ගලයා වෙත ඉදිරිපත් කර ඇතැයි පොලිසිය කියයි

එම අවස්ථාවේදී මරණකරු විසින් මොන කැසට් යන්ත්‍රය ද බං යයි පවසා ඇති අතර එම අවස්ථාවේදී සැකකරු හා මරණකරු අතර බහින් බස්වීම දුරදිග යාමෙන් අනතුරුව සැකකාර සින්දු කියන්නා සඟවාගෙන සිටි තියුණු ආයුදයෙන් මරණකරුගේ පිට ප්‍රදේශයට ඇණ පලා ගොස් තිබූ බව පොලිසිය කියයි.

බරපතළ තුවාල ලද පුද්ගලයා ඒ මොහොතේම කොළඹ ජාතික රෝහලට ඇතුළත් කර ඇති අතර ඒ වන විට ඔහු මියගොස්බ සිටි බව පොලිස් නිලධාරියෙක් පැවැසීය

සැකකරු බස් රථයක සින්දු කියමින් සිට යාබද බස් රථයට ගොඩවීමට යාමේදී අත්අඩංගුවට ගත් බව පොලිසිය කියයි.

ඒ වන විටත් සැකකරු ඔහු පිහියෙන් අනින ලද පුද්ගලයා කැසට් යන්ත්‍රය උකස් ලබාගත් පුද්ගලයා නොවන බවත් හෝ ඔහු මිය ගිය බවක් නොදැන සිටි බවත් පොලිස් නිලධාරියා වැඩිදුරටත් පැවසීය.