(චාපා මධුභාෂිණී)

අපේ ආණ්ඩුවක් යටතේ පාර්ලිමේන්තුවේ මන්ත්‍රීවරුන්ට, ජනාධිපතිට, අගමැතිට ඇතුළු සියළු දෙනාටම ලබා දුන් විශ්‍රාම වැටුප වහාම හෝසි කරනවා. ප්‍රේමදාස මහත්තයා ජනාධිපති වෙලා හිටියා ඒතුමා මිය ගියාට පස්සේ ඒතුමගේ නෝනා ප්‍රේමදාස මහත්මියට ආණ්ඩුවේ සල්ලිවලින් විශ්‍රාම වැටුපක් තවම ගෙවනවා යැයි ජනතා විමුක්ති පෙරමුණේ ප්‍රචාරක ලේකම් ටිල්වින් සිල්වා මහතා පවසයි.

මැදිරිගිරිය දියසෙන්පුර නගරයේ පැවැති ප්‍රධාන රැස්වීමක් අමතිමින් ටිල්වින් සිල්වා මහතා මේ බව පැවැසීය.

එහිදි අදහස් දක්වමින් ටිල්වින් සිල්වා මහතා මෙසේ ද කීය.

මම අහන්නේ සජිත් මහත්තයට බැරිද අම්ම බලා ගන්න. අපි අපේ අම්මලා බලා ගන්නවා. සජිත් මහත්තය විපක්ෂ නායකනේ ඒතුමට වත්කමක් තියෙනවනේ. ඒතකොට ඒතුමට අම්මව බලා ගන්න බැරිද. අම්මා ආණ්ඩුවේ පිහිටෙන් ජීවත් වෙනවා. පුතා ආණ්ඩුව ගන්න කතා කරනවා.

ඇමති කෙනකුට වාහන තුනක් තියෙනවා. රියැදුරන් තුනක් දෙනවා. තුන්දෙනාටම ආණ්ඩුව පඩි ගෙවනවා. ඒ වාහන තුනටම ආණ්ඩුවෙන් නොමිලේ තෙල් ගහලා දෙනවා. ගෙයකුත් දෙනවා. ඒ් ගෙදර වතුර, ලයිට්, ටෙලිෆෝන් බිල් සියල්ල ගෙවනවා. පුදුම ගෙවිල්ලක් ඒවා නවත්වන්න ඕනේ.

කෙහෙලිය රඹුක්වැල්ල මහත්තයාගේ වතුර බිල ඒකතුවෙලා ඇවිත් තිබුණා රුපියල් ලක්ෂ 18 යි. බීලද ? නාලද? පඩියක් ගෙව්වට කමක් නෑ. සියළු දීමනා නවත්වන්න ඕනේ. මැදිරිගිරිය දියසෙන්පුර ප්‍රදේශයේ පැවැති ජන හමුවකදී ජනතා විමුක්ති පෙරමුණේ ප්‍රචාරක ලේකම් ටිල්වින් සිල්වා මහතා මේ බව පැවැසීය.

මෙම අවස්ථාවට සමස්ත ලංකා ගොවි ජන සම්මේලනයේ ලේකම් පොලොන්නරුව දිස්ත්‍රික් ප්‍රධාන සංවිධායක පී.බී.සරත්, කවුඩුල්ල ගොවි ව්‍යාපාරයේ සභාපති කේ.ජි. අශෝක කරුණාසේන මැදිරිගිරිය ප්‍රාදේශීය සභා මන්ත්‍රීවරුන් වන සුරේෂ් ඉඳුනිල් සහ අමිල් පෙරේරා යන මහත්වරු ද මෙම අවස්ථාවට එක්ව සිටියහ.