(රෝෂන් තුෂාර)

ගංවතුරින් අවතැන් වූ පුද්ගලයන්ට සහන සැලසීමේ මුවාවෙන් රජයේ මුදල් සපරාදී සාවද්‍ය පරිහරණය කළේ යැයි කියන හිටපු අමාත්‍යය  අනුර ප්‍රියදර්ශන යාපා, ඔහුගේ බිරිඳ ඇතුළු සැකකරුවන් සිව්දෙනාගේ ඇප කොන්දේසි ලිහිල් කිරීමට කොළඹ අතිරේක මහේස්ත්‍රාත් හර්ෂණ කැකුණුවල මහතා අද (06) නියෝග කළේය.

සෑම මසකම අවසන් ඉරුදින අපරාධ පරීක්ෂණ දෙපාර්තමේන්තුවේ පෙනී සිටිය යුතු බවට  නිකුත් කළ ඇප කොන්දේසිය ඉවත් කරමින් ඇප ලිහිල් කිරීමට මහේස්ත්‍රාත්වරයා නියෝග කළේය.

මෙම පැමිණිල්ල ඊයේ කැඳවූ අවස්ථාවේදී සැකකරුවන් වෙනුවෙන් පෙනී සිටි නීතිඥවරුන් කළ ඉල්ලීම් සලකා බැලීමෙන් පසුව මෙසේ ඇප කොන්දේසි ලිහිල් කෙරිණි.

පැමිණිල්ල කැඳවූ අවස්ථාවේදී ඇප මත සිටින සැකකරුවන් වන හිටපු අමාත්‍යය අනුර ප්‍රියදර්ශන යාපා,ඔහුගේ බිරිඳ වෛද්‍ය ධම්මිකා ශිරාණි සුමනරත්න,ඛනිජ තෙල් නීතිගත සංස්ථාවේ හිටපු සභාපති එස් අමරසේකර හා අමාත්‍යවරයාගේ සම්බන්ධීකරණ ලේකම් වරයෙකු වූ  අනුර සෙනවිරත්න අධිකරණයේ පෙනී සිටියේය.

2014 වසරේ දී බිංගිරිය, නාරම්මල ප්‍රදේශවල ගංවතුරින් අවතැන් වූ පුද්ගලයන්ට සහන සැලසීමේ මුවාවෙන් ඛනිජ තෙල් නීතිගත සංස්ථාව මගින් රුපියල් 6146110ක මුදලක් ලබාගෙන, එම මුදලින් ලබා ගත්තේ යැයි කියන වියලි ආහාර  ද්‍රව්‍ය ගංවතුරින් අවතැන් වූවන්ට  ලබාදීම නොකර 2015 වසරේ ජනාධිපතිවරණ සමයේ වියළි ආහාර මලු බෙදා දීම සම්බන්ධයෙන් මෙම විමර්ශනය සිදුකෙරේ.