(ශාන්ත ප්‍රදීප් කුමාර කුලරත්න)

මොරටුව විශ්ව විද්‍යාලයේ ජාතික ඩිප්ලෝමා තාක්ෂණ පීඨය මුළුමනින්ම මිලිටරිකරණයට ලක්ව ඇති බවත් වහාම පරිපාලනය වෙනස්කොට ශිෂ්‍යයින්ගේ අයිතිවාසිකම් තහවුරු කරන ලෙසත් ඉල්ලා NDT ශිෂ්‍ය සංගමය විසින් සංවිධානය කර තිබූ පන්දම් විරෝධතාවයක් හෝමාගම දියගම තාක්ෂණ පීඨය ඉදිරිපිටදී ඊයේ  (18) දා රාත්‍රී  පැවැත්වුණි.

එහිදී  සිසුන් 700 පමණ පිරිසක් දියගම තාක්ෂණ පීඨය ඉදිරිපිටට පැමිණ පන්දම් දල්වා විරෝධතා පාඨ කියමින් පැය එක පමණ කාලයක් උද්ඝෝෂණයේ නිරත විය.

සිය  උපාධිය කඩිනම් කරනු, සිසු අයිතීන් තහවුරු කරනු, NDT වනසන හමුදා අධ්‍යක්ෂක වහා ඉවත් කරනු, වත්මන් පරිපාලනය විසින් මේ වනවිට ශිෂ්‍යයන්ට පනවා ඇති අසාධාරණ පන්ති තහනම් ඉවත් කරනු , විශ්ව විද්‍යාලය තුල පවත්වාගෙන යන මිලිටරි පාලනය හෙළා දකිමු, අධ්‍යක්ෂකවරයා විසින් සිසුන්ගේ අධ්‍යාපනයේ නිදහසට දිගින් දිගටම එල්ල කරන බාධා කිරීම් වහා නවත්වනු , වත්මන් ඩිප්ලෝමාව උපාධියක් දක්වා වැඩිදියුණු කිරීමේ වැඩපිළිවෙළ කඩිනම් කරනු’ යනුවෙන් ඔවුන්ගේ ඉල්ලීම් විය.

මිට පෙර අවස්ථා දෙකකදී මෙසේ විරෝධතා පැවති අතර ඊට පරිපාලනයෙන් යහපත් ප්‍රතිචාරයක් නොලැබීම නිසා මෙම විරෝධතාවය සංවිධානය කළ බව සිසුහු පැවසූහ.