(සුජිත් හේවාජුලිගේ සහ  අංජුල මහික වීරරත්න)

වයස 55 පිරුණු කැමති ඕනෑම රාජ්‍ය සේවකයකුට ලබන ජනවාරි  1වැනිදා සිට විශ්‍රාම යා හැකි බව රාජ්‍ය  සේවා,පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන් මහතා පාර්ලිමේන්තුවේදී අද (24)  පැවැසීය.

ඔහු මෙසේ පැවසුවේ  ජාතික ජන බලවේගය පක්ෂයේ ගම්පහ දිස්ත්‍රික් මන්ත්‍රී විජිත හේරත් මහතා ඇසූ ප්‍රශ්නයකට පිළිතුරු දෙමිනි.

ලබන මස  විශ්‍රාම යෑමට නියමිතව සිටි  රජයේ සේවකයන් විශ්‍රාම යෑමේ වයස  65 දක්වා වැඩිකිරීමට  ගත් තීරණය හේතුවෙන්  යම් කුතුහලයකින් පසුවන හෙයින්  ඒ සම්බන්ධයෙන් ප්‍රකාශයක් කරන්නැයි  විජිත හේරත් මහතා මෙහිදී ඉල්ලීමක් කළේය.

රජයේ සේවකයන් විශ්‍රාම යා හැකි උපරිම වයස 65දක්වා වැඩි කිරීමට තීරණය කර ඇතත් එය  හැට තුනක් දක්වා අඩු කිරීමට කටයුතු කරගෙන යන බවට ආරංචි ලැබී ඇතැයිද  මන්ත්‍රීවරයා මෙහිදී සඳහන් කළේය.