(මුදිතා දයානන්ද)
 
පාර්ලිමේන්තුව විසිරවීමට ජනාධිපති නිකුත් කළ ගැසට්ටුව අත්හිටුවීමට ශ්‍රේෂ්ඨාධිකරණය දුන් තීන්දුව අනුව පරණ ගැසට්ටුව ක‍්‍රියාත්මක විය යුතු බවත් ඒ අනුව පාර්ලිමේන්තුව හෙට (14) කැඳවිය යුතු බවත් ජනතා විමුක්ති පෙරමුණේ ප‍්‍රධාන ලේකම් ටිල්වින් සිල්වා මහතා අද (13) පැවසීය.

ටිල්වින් මහතා මේ බව පැවසුයේ විහාර මහතා දේවි එළිමහත් රංග පීඨයේ දී පැවති 29 වන ඉල්මහ විරු සමරු උළලේදීය.

ශ්‍රේෂ්ඨාධිකරණය දුන් තීන්දුව ප‍්‍රජාතන්ත‍්‍රවාදය පැත්තෙන් ඉතාමත් වැදගත් යහපත් තීන්දුවක් බවද කුමන්ත‍්‍රණවලින් බලය ඇල්ලීමට ගනු ලබන ක‍්‍රියාමාර්ග පැරදවීමට එයට ශක්තිමත්ව මුහුණ දෙන බලවේගවලට හැකියාව ඇති බවද ඔහු තවදුරටත් පැවසීය. 

මෙම තීන්දුවෙන් කුමන්ත‍්‍රණ කෙළවර නොවන බැවින් ඉදිරියේ දී එන ඕනෑම කුමන්ත‍්‍රණයකට මුහුණ දීමට තම පක්ෂය සුදානම් සේම ඒ සඳහා පෙළ ගැසෙන ලෙස ජනතාවගෙන් ඉල්ලා සිටින බවද ඔහු පැවසීය.

පාර්ලිමේන්තුව විසිරුවීමට නිකුත් කළ ගැසට්ටුව අත්හිටුවන්නේ නම් එයට පෙර නිකුත් කළ ගැසට්ටුව එනම් 14 වැනි දාට පාර්ලිමේන්තුව කැඳවීමට නිකුත් කළ ගැසට්ටුව ක‍්‍රියාත්මක විය යුතු බවද ඒ අනුව අද පාර්ලිමේන්තුව කැඳවිය යුතු බවද ටිල්වින් මහතා වැඩිදුරටත් පැවසීය.