බිඟුන් මේනක ගමගේ 
 
අයවැය තෙවැනි වර කියවීමේදී හෙට(5) ඊට එරෙහිව සිය පක්ෂය ඡන්දය පාවිච්චි කරන බව ජනතා විමුක්ති පෙරමුණ හා ජාතික නිදහස් පෙරමුණ පවසයි.
 
මේ සම්බන්ධයෙන් කළ විමසීමේදී ජනතා විමුක්ති පෙරමුණේ පාර්ලිමේන්තු මන්ත්‍රී වෛද්‍ය නලින්ද ජයතිස්ස හා ජාතික නිදහස් පෙරමුණේ පද්ම උදයශාන්ත ගුණසේකර යන මන්ත්‍රීවරු ඒ බව සහතික කළහ.
 
2019 සමස්ත වියදම රුපියල් බිලියන 4500 න් 50%ක්ම වෙන්කර තිබෙන්නේ ආණ්ඩුව ලබාගත්ත ණය පොලී වාරිකය ගෙවීමට යැයි ද ආණ්ඩුවේ මේ වසරේ ඇත්ත වියදම ඉතිරි 50% යැයි ද ජවිපෙ පාර්ලිමේන්තු මන්ත්‍රී නලින්ද ජයතිස්ස මහතා අවධාරණය කළේය.
 
රජයේ සියලුම සේවා ගාස්තුවලට 15%ක බදු වැඩිවීමක් සිදුකිරීමෙන් 2019 දී ඒක පුද්ගල බදු බර රු. 60, 704 ක් බවට වැඩිවනු ඇතැයි ද එය පසුගිය වසරේ ඒක පුද්ගල බදු බරට වඩා රු. 11,000කින් වැඩිවීමක් යැයි ද වෛද්‍ය ජයතිස්ස මහතා සඳහන් කළේය. 
 
ආණ්ඩුව ගෙනා අයවැය රටේ ප්‍රගතියට කිසිදු ආකාරයකින් හේතු නොවන්නේ යැයි ද මේ රටේ ජනතාව පෙළන ආර්ථික ප්‍රශ්නවලට එයින් විසඳුම් නොලැබෙන්නේ යැයි ද ජානිපෙ පාර්ලිමේන්තු මන්ත්‍රී පද්ම උදයශාන්ත ගුණසේකර මහතා කීය.
 
රට තවදුරටත් ණය කර ජනතාව ඇස් බැන්ඳුමකට ලක් කරන විජ්ජාවන්වලින් අයවැය පිරී ඇතැයි ද එයින් කියවෙන්නේ ආණ්ඩුවට තවදුරටත් රට කරවිය නොහැකි බව යැයි ද ගුණසේකර මහතා වැඩිදුරටත් සඳහන් කළේය.