සෞඛ්‍ය දෙන තෙල් ගන්න ටෝකන් දුන් අයත් ඇවිත්

(තිලකරත්න දිසානායක)

ගම්පහ සමූපකාර ඉන්ධන පිරවුම්හලට ලැබී තිබූ පෙට්‍රල් ලීටර් 6600 ක ප්‍රමාණයක් අද (1) දිනයේ සෞඛ්‍ය කාර්ය මණ්ඩලයට ලබාදීමට යාමේදී ටෝකන්පත් ලබාදී තිබූ පිරිසක්ද ඉන්ධන ලබාගැනීමට පැමිණීම හේතුවෙන් එම ස්ථානයේ උණුසුම්කාරී තත්ත්වයක් උද්ගත විය.

සිකුරාදා දිනය සෞඛ්‍ය කාර්ය මණ්ඩලය සදහා ඉන්ධන ලබාදීමට වෙන්කොට තිබීම මත ඊයේ  (30) සවස 3 පමණ සිට සෞඛ්‍ය කාර්ය මණ්ඩලය සමූපකාර පිරවුම්හල අසල රැඳී සිට ඇති අතර අද පෙරවරුවේ ඉන්ධන ලබාදීමට සූදානම් වීමේදී මෙම  ප්‍රශ්නකාරී තත්ත්වයක් ඇති විය.

ගම්පහ රෝහල අසල සිට ඔරුතොට දක්වා කිලෝ මීටර් තුනක පමණ දුරක් සෞඛ්‍ය කාර්ය මණ්ඩලයේ රථ වාහන තබාගෙන සිටි අතර ඉන්ධන ලබා නොදීම මත දෙපිරිස අතර ඇතිවූ ප්‍රශ්නකාරී තත්ත්වය හේතුවෙන්  පිරවුම්හල ඉදිරිපිට මාර්ගයද අවහිර කිරීම මත පොලීසිය සහ යුද හමුදාවද කැඳවීමට පියවර ගැණින.

අනතුරුව සහකාර පොලිස් අධිකාරී තුසිත කුමාර මහතා මැදිහත්ව , සිකුරාදා දිනය සෞඛ්‍ය කාර්ය මණ්ඩලයට ඉන්ධන ලබා දීම පිනිස වෙන්කොට ඇති බැවින් ඒ අනුව ක්‍රියාකරන ලෙස දැනුම්දීම මත අද පස්වරු 3 ට පමණ ඉන්ධන නිකුත් කිරීමට පියවර ගනු ලැබීය.