(මනෝප්‍රීය ගුණසේකර)

මෙරටදී ණයවර ලිපි විවෘත කර වෙනත් රටකින් වාහන ආනයනය කිරීම හේතුවෙන් ශ්‍රී ලංකා රේගුව විසින් රඳවාගෙන සිටින වාහන මුදා හරින නියෝගයක් නිකුත් කරන්නැයි ඉල්ලා වාහන ආනයනකරුවන් ගොනුකර ඇති රිට් පෙත්සම් සමථයට පත් කිරීමට ඇති හැකියාව සොයා බැලීම සඳහා පෙත්සම් ලබන 14 වැනිදා යළි කැඳවන ලෙස අභියාචනාධිකරණය අද (10) නියම කළේය.

තම වාහන ශ්‍රී ලංකා රේගුව විසින් රඳවා ගැනීමට එරෙහිව වාහන ආනයනකරුවන් විසින් ගොනුකර තිබූ පෙත්සම් 15ක් කැඳවූ අවස්ථාවේදී ඉදිරිපත් වු කරුණු සළකා බැලීමෙන් අනතුරුව එලෙස නියම කළේය.

අභියාචනාධිකරණ සභාපති විනිසුරු රොහන්ත අබේසූරිය සහ ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඩුල්ල හමුවේ පෙත්සම් සළකා බලන ලදී.

පෙත්සම් කැඳවූ අවස්ථාවේදී වගඋත්තරකාර ශ්‍රී ලංකා රේගුව වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතීඥ සුමති ධර්මවර්ධන මහතා කරුණු දක්වමින් රේගුව විසින් රඳවාගෙන සිටින මෙම වාහන කොන්දේසි කිහිපයකට යටත්ව මුදා හැරීමට ඇති හැකියාව පිළිබඳව මුදල් අමාත්‍යංශය දැනුම් දීමත් කර ඇතැයි පැවසීය.

ඒ අනුව අදාල වාහන සමාගම් ඇපකරයක් හෝ බැංකු ඇපකරයක් තැබීමෙන් පසු ශ්‍රී ලංකා රේගුව වෙත ගෙවිය යුතු බදු මුදල් ගෙවීමෙන් පසු අදාළ වාහන මුදා හැරීම සම්බන්ධයෙන් සලකා බැලිය හැකියැයි ජනාධිපති නීතීඥ සුමති ධර්මවර්ධන මහතා සඳහන් කළේය.

පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥවරුන් වන ඉක්‍රම් මොහොමඩ්, ෆයිසර් මුස්තාපා යන මහත්වරු ඇතු`ථ නීතිඥවරු දැනුම් දුන්නේ මෙම කොන්දේසි මත අදාල පෙත්සම් සමථයට පත් කර ගැනීමට ඇති හැකියාව දැනුම් දීම සඳහා දිනයක් දෙන්නැයි ඉල්ලා සිටියහි.

කරුණු සළකා බැලීමෙන් අනතුරුව පෙත්සම් සමතයට පත්කිරීමට ඇති හැකියාව පිළිබඳව සොයා බැලීම සදහා පෙත්සම් ලබන 14 වැනිදා කැඳවීමට  නියෝග කළේය.