(ජේ.කේ.එල්. චාමින්ද)

 මෙරට  විශේෂඥ වෛද්‍ය ක්ෂේත්‍ර  35කට අදාළව  විශේෂඥ වෛද්‍යවරුන්  972 දෙනෙකුගේ හිගයක් පවතින බැව්  ජාතික විගණන කාර්යාලය මගින් නිකුත්කොට ඇති විගණන වාර්තාවක සදහන් වේ.

අමාත්‍ය මණ්ඩලය විසින් අනුමත කරණු ලැබු විශේෂඥ වෛද්‍ය තනතුරු සංඛ්‍යාව  සැසදිමේ දි  2023 වර්ෂයේ  නොවැම්බර් මස  වනවිට  විශේෂඥ වෛද්‍යවරුන්ගේ මෙම හිගය පවතින බවද මෙම වාර්තාවේ සදහන් වේ.

අමාත්‍ය මණ්ඩල  අනුමැතියට අනුව  විශේෂඥ වෛද්‍ය ක්ෂේත්‍ර 58කට අදාළව  අනුමත  විශේෂඥ වෛද්‍යවරුන්ගේ සංඛ්‍යාව 2837කි. එහෙත් විගණනයට ඉදිරිපත් කරණු ලැබු තොරතුරු අනුව  විශේෂඥ වෛද්‍ය ක්ෂේත්‍ර 50කට අදාළව  එම සංඛ්‍යාව 2740කි.

 එමෙන්ම විශේෂඥ වෛද්‍ය ක්ෂේත්‍ර 08කට අදාළව  අනුමත තනතුරු 66ක් සදහා  කිසිදු වෛද්‍යවරයකු පත්කර නොමැති බවද විගණනය මගින් අනාවරණය කොටඇත.

එහෙත් විශේෂඥ වෛද්‍ය ක්ෂේත්‍ර 12කට අදාළව  විශේෂඥ  වෛද්‍යවරුන් 113ක් අතිරික්තව සේවයේ යොදවා තිබුණි. විශේෂඥ වෛද්‍යවරුන් සේවයේ යෙදවිම සදහා  විධිමත් අනුමැතියක් හෝ ලබා නොගත්  විශේෂඥ ක්ෂේත්‍ර 12ක් තුල  විශේෂඥ වෛද්‍යවරු 141ක්  සේවයේ  යොදාවා තිබු බවද විගණන වාර්තාවේ සදහන් වේ.