(නිමන්ති රණසිංහ)

ජංගම දුරකථනයක් සන්තකයේ තබා ගත් සිද්ධියට අදාළව තමන් නිවැරදිකරු බව කොළඹ මැගසින් බන්ධනාගාරයේ රඳවා සිටින හිටපු අමාත්‍ය රිෂාඩ් බදුර්දීන් මහතා බන්ධනාගාර විනිශ්චය මණ්ඩලයෙහි මහේස්ත්‍රාත්තුමා ඉදිරියේ අද (13 ) සඳහන් කර ඇත.

මෙම සිද්ධියට අදාළව ස්කයිප් තාක්ෂණය ඔස්සේ මහේස්ත්‍රාත්වරයා විසින්  නඩුව විභාගයට ගනු ලැබූ අවස්ථාවේ දී සැකකාර හිටපු අමාත්‍යවරයා එසේ සඳහන් කර ඇතැයි බන්ධනාගාර කොමසාරිස් (පාලන) මාධ්‍ය ප්‍රකාශක චන්දන ඒකනායක මහතා පැවසීය.

සිදුවීම සම්බන්ධයෙන් බන්ධනාගාර ආඥාපනතට අනුව සැකකරු වෙත චෝදනා නගා ඇතැයිද ඔහු සඳහන් කළේය .

ඒ අනුව එම සිද්ධියට අදාළව  තමන් නිවැරදිකරු බවට සැකකරු පවසා ඇති අතර, නැවතත් එම නඩුව සඳහා ලබන 24 වැනිදා ඔහු ඉදිරිපත් කිරීමට නියමිතව ඇතැයිද  බන්ධනාගාර මාධ්‍ය ප්‍රකාශකවරයා පැවසීය

හිටපු අමාත්‍යවරයාට ජංගම දුරකථනයක් ලබාදුන් බවට අනාවරණය වූ මැගසින් බන්ධනාගාර ජේලර්වරයෙක් වහාම ක්‍රියාත්මක වන පරිදි ස්ථාන මාරු කර යැවීමට බන්ධනාගාර මූලස්ථානය කටයුතු කර තිබිණි.

බන්ධනාගාර නිලධාරීන් වාට්ටු සෝදිසි කිරීම සඳහා පැමිණි අවස්ථාවේදී සැකකාර රිෂාඩ් බදියුදීන් මහතා ජංගම දුරකථනයෙන් ඇමතුම් ලබා ගනිමින් සිට තිබු බවට කරුණු අනාවරණය වූයේ ඉකුත් සැප්තැම්බර් මස (02) වැනිදාය.

නිලධාරීන් දුටු සැකකරු එම ජංගම දුරකථනය අසල ජනේලයෙන් ඉවතට විසිකර ඇති බවත් පසුව නිලධාරීන් විසින් එම දුරකථන සොයා ගනු ලැබූ බවත් වාර්තා විණි .

පාස්කු ඉරිදා ත්‍රස්ත ප්‍රහාරය සම්බන්ධයෙන් අපරාධ පරීක්ෂණ දෙපාර්තමේන්තුව සිදුකරන විමර්ශනයකට අදාළව හිටපු අමාත්‍ය රිෂාඩ් බදුර්දීන් මහතා සැකපිට රක්ෂිත බන්ධනාගාර ගත කර සිටී.