(රෝෂන් තුෂාර)

පුද්ගලයෙකුට වෙඩි තබා ඝාතනය කිරීම සම්බන්ධයෙන් චෝදනා ලැබ මරණීය දණ්ඩනය නියම වී සිටින මහා පරිමාණ මත්ද්‍රව්‍ය ජාවාරම්කාරයකු යැයි කියන චමින්ද රවී ජයනාත් හෙවත් දෙමටගොඩ චමින්දට අයථා අන්දමින් මුදල් ඉපවූයේ යැයි සඳහන් කරමින්  කොළඹ වංචා විමර්ශන ඒකකය කොළඹ අතිරේක මහේස්ත්‍රාත් මංජුල රත්නායක මහතා ඉදිරියේ අද (30) නඩු පැවරීය.

උදිත් නිශාන්ත යන වෙනත් අයකුගෙ නමින් රුපියල් මිලියන 27ක බැංකු ගිණුමක් පවත්වාගෙන යෑමට එරෙහිව මෙම පැමිණිල්ල ගොනු කළේය.

උදිත් නිශාන්ත නැමැති අය මෙම පැමිණිල්ලේ  පළමු සැකකරු ලෙස නම්කර ඇත.

දෙමටගොඩ චමින්ද සැකකරු විසින් මත්ද්‍රව්‍යය ජාවාරම් කොට සොයා ගන්නා ලද  මුදල් මෙලෙස පළමු සැකකරුගෙ නමින් පවත්වාගෙන ගිය ගිණුම ඔස්සේ පරිහරණය කොට ඇති බවට විමර්ශනවලදී කරුණු අනාවරණය වී ඇති බව පොලිසිය අධිකරණයට කරුණු ඉදිරිපත් කළේය.

ඉදිරිපත් වූ කරුණු සලකා බැලූ අතිරේක මහේස්ත්‍රාත් මංජුල රත්නායක මහතා මෙම පැමිණිල්ල දෙසැම්බර් මස 12 වන දින කැඳවීමට දින නියම කළ අතර  සැකකරුවන්   එදිනට ස්කයිප් තාක්ෂණය ඔස්සේ  අධිකරණයට ඉදිරිපත් කරන ලෙසට බන්ධනාගාර නිලධාරීන්ට නියම කළේය.