(රොමේෂ් මධූෂංඛ)

යාපනය වඩමාරච්චි තම්පසිට්ටි වට්ටුවාන් ප්‍රදේශයේ දී පවුල් දෙකක් අතර වූ ආරවුලක් දුරදිග යාම හේතුවෙන් අතක් වෙන්වන සේ කපාදමා රැගෙන ගිය පුද්ගලයෙකු ඊයේ (01) අත්අඩංගුවට ගත් බව පේදුරුතුඩුව පොලිසිය පැවසීය.

අදාල පවුල් කලක සිට ඉඩම් ගැටලුවක් හේතුවෙන් ආරවුල් ඇති කරගන්නා අතර ඊයේ දින ද එලෙසින් ආරවුලක් ඇති වූ අවස්ථාවේ දී සිය මස්සිනාගේ අත වෙන්වන සේ කපා, වෙන් වූ අතේ කොටස ද රැගෙන අනෙක් මස්සිනා පලා ගොස් ඇතැයි පොලිසිය කියයි.

පසුව අත කපා දැමීමෙන් බරපතල තත්වයේ සිටි පුද්ගලයා පේදුරුතුඩුව රෝහලට රැගෙන යාමෙන් පසුව වැඩිදුර ප්‍රතිකාර සඳහා යාපනය ශික්ෂණ රෝහලට මාරුකොට යැවීය.

මෙලෙස අතක කොටසක් අහිමි වී ඇත්තේ 30 හැවිරිදි ‌ෙසල්වනායගම් සෙන්තුරන් නැමත්තාට වූ අතර ඔහුගේ ඥාතීන් විසින් මේ පිළිබඳ ව පේදුරුතුඩුව පොලීසියට පැමිණිලි කිරීමට පියවර ගෙන තිබුණි.

මේ සම්බන්ධයෙන් ක්‍රියාත්මක වූ පොලිසිය විසින් පලාගිය සැකකරු අත්අඩංගුවට ගත්ත ද රැගෙන ගිය අතෙහි කොටස මෙතෙක් හමු නොවීම හේතුවෙන් තුවාල ලැබූ පුද්ගලයාට අතෙහි මැණික්කටුව ආසන්නයෙන් අතෙහි කොටස අහිමි විය.

අත්අඩංගුවට ගත් සැකකරු පේදුරුතුඩුව අධිකරණයට ඉදිරිපත් කිරීමට පියවර ගෙන ඇති බව පරික්ෂණ සිදුකරන පේදුරුතුඩුව පොලීසිය වැඩිදුරටත් පැවසීය.