(අංජුල මහික වීරරත්න)

ශ්‍රී ලංකාවේ විදේශ සංචිතය වසර දෙකක් ඇතුළත ඇමරිකානු ඩොලර් බිලියන 15 දක්වා වැඩිකර ගැනීමට කිසිඳු වැඩපිළිවෙලක් නැති පසුබිම යටතේ නියම යුද්ධය ආරම්භ වන්නේ 2028 වසරේ අවසානයේදී බව හිටපු ජනාධිපති එක්සත් ජාතික පක්ෂ නායක රනිල් වික්‍රමසිංහ මහතා කොළඹදී පැවසීය.

මහා බැංකුව ප්‍රකාශ කරන ආකාරයට මේ වසර අවසානය වනවිට විදේශ සංචිත ප්‍රමාණය ඇමරිකා ඩොලර් බිලියන 8ක් වුවත් ඉතිරි බිලියන 7 සොයා ගැනීමේ කිසිඳු වැඩපිළිවෙලක් මෙතෙක් සකස් කර නැතැයිද රනිල් වික්‍රමසිංහ මහතා වැඩිදුරටත් කීවේය.

විදේශ සංචිතය ඇමරිකානු ඩොලර් බිලියන 15 දක්වා වැඩි කර නොගතහොත් දරුණුතම යුද්ධයට මුහුණදීමට ශ්‍රී ලංකාවට සිදුවනු ඇතැයිද හිටපු ජනාධිපති රනිල් වික්‍රමසිංහ මහතා තවදුරටත් කියා සිටියේය.

රනිල් වික්‍රමසිංහ මහතා මේ අදහස් පළ කළේ හිටපු අමාත්‍ය රංජිත් සියඹලාපිටිය මහතා රචිත “යුද දෙකකට උර දී“ ග්‍රන්ථය දොරට වැඩීමේ උත්සවයේ ප්‍රධාන දේශනය කරමිනි.

කොළඹ බණ්ඩාරනායක සම්මන්ත්‍රණ ශාලා පරිශ්‍රයේ ලෝටස් ශාලාවේදී උත්සවය පැවැත්විණි.