පිහිනුම් කී‍්‍රඩාව පාසල් විෂයක් වශයෙන් ලයිසියම් ජාත්‍යන්තර පාසල් සමූහයට එක්වී තිබේ. මෙය ශී‍්‍ර ලංකාවේ පාසල් ක්ෂේත‍්‍රයට පාසල් විෂයක් වශයෙන් කිසියම් කී‍්‍රඩාවක් එක්වූ පළමු අවස්ථාව බවද අධ්‍යාපන අමාත්‍යාංශයේ ජ්‍යෙෂ්ඨ නිලධාරියෙක් පැවසීය.

නිශාන්ත පෙරේරා

"පාසල් විෂය දහරාව අතරට ඇතුළත් සෞඛ්‍ය පාඩමේදී නම් කී‍්‍රඩා පිළිබඳව හැඳින්වීමක් කෙරෙනවා. ඒත් කී‍්‍රඩාව ප‍්‍රායෝගික වශයෙන් විෂය මාලාවට ඇතුළත් වෙලා නෑ” යයි ද එම නිලධාරියා වැඩිදුරටත් පැවසීය.
ලයිසියම් ජාත්‍යන්තර පාසල් සමූහයේදී පිහිනුම් ක‍්‍රීඩාව ක‍්‍රමානුකූලව, පියවර හතරක් යටතේ, පළමු ශ්‍රේණියේ සිට විෂයක් ලෙස ක‍්‍රියාත්මක කරන බවත් එහිදී නුගේගොඩ ලයිසියම් ජාත්‍යන්තර පාසල සුවිශේෂී ක‍්‍රමවේදයන් අනුගමනය කරන බවත් ලයිසියම් ජාත්‍යන්තර පාසල් සමූහයේ පිහිනුම් උපදේශක මෙන්ම නුගේගොඩ ලයිසියම් ජාත්‍යන්තර පාසලේ පිහිනුම් උපදේශක නිශාන්ත පෙරේරා මහතා පවසයි. නිශාන්ත පෙරේරා මහතා ඇමෙරිකාවේ ෂෂෂ වැනි ශ්‍රේණියේ පිහිනුම් උපදේශක සහතික ලත් පුහුණුකරුවෙකි.
"අපේ ක‍්‍රමවත් සැලැස්මක් තිබෙනවා. ලයිසියම් ජාත්‍යන්තර පාසලේ පළමු වසරේ සිට 5 වැනි වසර දක්වා පිහිනුම් කියන්නේ පාසල් විෂයක්. එහිදී ශිෂ්‍ය ශිෂ්‍යාවන්ගේ දස්කම් සඳහා ඔවුන්ගේ ප‍්‍රගති වාර්තාවට ලකුණු එකතු වෙනවා” යයිද නිශාන්ත පෙරේරා මහතා පවසයි.
නුගේගොඩ ලයිසියම් ජාත්‍යන්තර පාසල වසර කීපයක්ම ජාත්‍යන්තර පාසල් පිහිනුම් තරගාවලියේ ශූරතාව දිනාගත් අතර පසුගිය වසරේ අනු ශූරතාව හිමිකර ගත්තේය.
ශ්‍රී ලංකා ජාතික පිහිනුම් කණ්ඩායමේද සහාය පුහුණුකරුවකු ලෙස කටයුතු කළ නිශාන්ත මහතා පැවසුවේ පසුගිය වසරේ ජාත්‍යන්තර පාසල් පිහිනුම් තරගාවලියට සහභාගි වීමට නියමිතව සිටි තම පාසලේ දක්‍ෂ ක‍්‍රීඩකයන් පස් දෙනකු තරගාවලියට සහභාගි නොවීමෙන් තම පාසලට ලකුණු 30 ක් පමණ අහිමිවූ බවයි.

ලයිසියම් පිහිනුම් කණ්ඩායමේ ප‍්‍රබල සාමාජිකයන් වන සහේන්, ෂෙනාල් සේනානායක සහ අමායා සිල්වා

"අපි මෙවරත් ශූරතාව දිනාගැනීමේ බලාපොරොත්තුවෙන් සිටියා, නමුත් අපිට ඒ සඳහා ලකුණු 48 ක් පමණ අඩු වුණා. අපේ ක‍්‍රීඩකයන් පස් දෙනෙක් විවිධ හේතු නිසා තරගාවලියට සහභාගි වුණේ නෑ. එම ක‍්‍රීඩකයන් ඉසව් හතකට පමණ සහභාගි වෙනවා.
එහිදී අපිට ලකුණු 30 ක් අහිමිවුණා” යයිද පෙරේරා මහතා වැඩිදුරටත් පැවසීය.
ජාතික තළයට දක්‍ෂ පිහිනුම් ක‍්‍රීඩකයන් රැසක් දායාද කිරිමේ බලාපොරොත්තුවෙන් සිටින ලයිසියම් ජාත්‍යන්තර පාසල වෙනුවෙන් ඉහළම දස්කම් පෙන්වීමට සෙනාල් සේනානායක, බිනුප නානායක්කාර, ලසත් ගමගේ, දෂාන්, දමිදු කොස්තා වැනි කී‍්‍රඩකයන් සමත් වී තිබේ. මෙම කී‍්‍රඩකයන් ජාතික තරගාවලියේදී ජයග‍්‍රහණ ලබන දිනය වැඩි ඈතක නොවන බවද හෙතෙම පවසයි.
කෙසේ වෙතත් දරු දැරියන් ඉහළ ශ්‍රේණිවලට යාමේදී අධ්‍යාපනය කෙරේ වැඩි අවධානයක් යොමු කරන හෙයින් ඇතැම් දරු දැරියන් ක‍්‍රීඩාව අතහරින ප‍්‍රවණතාවක් ඇති බවත් මේ වසරේදී තම කණ්ඩායමේ දස්කම් පහළ බැසීමට එයත් හේතුවක් වූ බවත් නිශාන්ත පෙරේරා මහතා පවසයි.
නුගේගොඩ ලයිසියම් ජාත්‍යන්තර පාසලේ පිහිනුම් කී‍්‍රඩාව වඩාත් ඉදිරියට ගෙන යාමට එහි අධ්‍යක්‍ෂිකා කුමාරි ගේ‍්‍රරු, විදුහල්පතිනී වෙනුරි හෙට්ටිආරච්චි, ක‍්‍රීඩා අධ්‍යක්‍ෂ සෑම් චන්ද්‍රසේන, නියෝජ්‍ය විදුහල්ති නිකිත ගේ‍්‍රරු සහ පුහුනුම් ක‍්‍රීඩා භාර ආචාර්ය ජේ. ඒ. සෝමචන්ද්‍ර යන මහත්ම මහත්මීන්ගෙන් ලැබෙන සහයෝගය විශේෂයෙන් අගය කරන බවද නිශාන්ත පෙරේරා මහතා පැවසීය.

ලයිසියම් විදුහලේ පිහිනුම් සංචිතය