අශෝක හඳගමගේ නිර්මාණය කළ ”ඉනියවන්” චිත‍්‍රපටයේ රංගනයට එක්ව සිටින දමිළ ශිල්පිණියන් දෙදෙනා වන  සුභා සහ නිරංජනී ගැන අද සිනමා ක්ෂේත‍්‍රයේ බොහෝ දෙනා කතා කරන බව කිව හැකියි. මේ දෙදෙනාගේම කුළුදුල් සිනමා රංගනය මෙය වුවද මුහුකුරා ගිය චරිත රංගනයක යෙදීම ඊට හේතුවය. ”ඉනියවන්” සමග ශ්‍රී ලාංකීය සිනමාවට ආ මේ දමිළ ශිල්පිනියන් දෙදෙනා සමග අපි පිළිසඳරකට එක්වෙමු.

නම් ගම් නැති චරිත කීපයක් වටා ගොඩනැගී ඇති ”ඉනියවන්” චිත‍්‍රපටයේ භාව ප‍්‍රකාශනයක් අපූරුවට ඉදිරිපත් කරන නිරංජනීගේ ගම නුවරය. නුවර පාසලකට ගියද එහි ගත කළ ඇය දැන් පදිංචිව සිටින්නේ වත්තලය. ඇයට සිටින්නේ මව සහ අක්කා පමණි. තාත්තා ජීවතුන් අතර නැත. වයස අවුරුදු විසිතුනක් වන නිරංජනී රැකියාව කරන්නේ ජාතික රූපවාහිනියේ දමිළ වැඩසටහන් අංශයේ නිවේදිකාවක ලෙසය. සිනමාවට අලූත්  මුහුණක් වුවද ළමා නාට්‍ය වේදිකාව සහ යොවුන් නාට්‍ය  වේදිකාව මෙන්ම ජාතික නාට්‍ය වේදිකාවට ඇය අමුත්තියක නොවෙයි. එම අංශ නියෝජනය කරමින් සම්මාන රැසක් ලැබූ ශිල්පිනියකි. චිත‍්‍රපටයක රඟපෑමට සිහිනයකින් නොසිතූ  ඇයට මෙම අවස්ථාව ලැබීම භාග්‍යයක් කොට සලකන්නීය.

”මෙහි රඟපාන චරිතය සඳහා එතරම්ම දෙබස් නැහැ. අපි ගන්නා සුසුමක සිට බැල්මක සිට සියල්ල හැගීම් වෙතින් ප‍්‍රකාශ කළ යුතු වුණා. වේදිකාවේදී හයියෙන් ශබ්ද කරලා කෑ ගහලා කළ රංගනයට වඩා මට මෙය අපූරු අත්දැකීමක් වුණා. ඇත්තටම මට මෙය රංග පාසලක් වුණා”

ඉනියවන් චිත‍්‍රපටයේ චරිතය ගැන එසේ කියන ඇයට වඩාත් ඉහළ ප‍්‍රතිචාර ලැබී ඇත්තේ සිංහල කතා කරන සිංහල සමාජයෙන් බවත් පවසන්නීය.
මම හිතන්නේ දමිළ සමාජයේ බොහෝ දෙනාටත් මෙය අපූරු අත්දැකීමක්. මොකද එයාලා සිංදු දෙකයි, ෆයිට්  දෙකයි. විහිළු ටිකකුයි, නැටුම් දෙකකුයි එක්ක චිත‍්‍රපට බලන්න පුරුදුවෙලා හිටියේ. මේ චිත‍්‍රපටය එයාලා වෙනස්ම තැනකට ගෙන ගිය බව මගේ හැඟීමයි.

මෙසේ පවසන නිරංජනී, සිංහල චිත‍්‍රපට කලාවේ ”ගාමිණී - මාලනී” යුවලට වඩාත් කැමතිය. නිරෝෂා විරාජිනී ගයන ”දුහුල් මලක මල් පෙත්තක” ගීතය ඇයගේ ප‍්‍රියතම ගීතයයි දමිළ ජාතික තැනැත්තියක වුවද ඇය යාපනයට ගොස් ඇත්තේ මෙම චිත‍්‍රපටයේ රූගත කිරීම්වලට පිංසිදු වන්නටය. යාපනයේ නල්ලූර්කෝවිලට යාම සිහිනයක් වූ බවත් එය ඉටු කරගත් බවත් නිරංජි පවසන්නීය.

සුභාෂිණීට කොළඹ අමුතු තැනැක් නොවේ. ඇය ඉපදී ඇත්තේ කොළඹදීය. යහපත් එෙඬ්රාගේ කන්‍යාරාමය සහ ශාන්ත අන්තෝනි බාලිකාවෙන් අධ්‍යාපනය හදාරා ඇත. අම්මා - තාත්තා, අයියා සහ මල්ලී ඇයගේ පවුලේ සාමාජිකයන්ය. සුභාෂිනීද ක්ෂේත‍්‍රයට පිවිස ඇත්තේ රූපවාහිනී නිවේදිකාවක ලෙසය. ”නේත‍්‍රා ටී. වී.  සහ පසුව නාලිකා ගණනාවක වැඩසටහන් මෙහෙයවා ඇති ඇය මේ දිනවල, වසන්තම් සහ සී. සී. එෆ්. ටී. වී. චැනලයට සම්බන්ධ බව පවසන්නීය. ඊට අමතරව දමිළ වැඩසටහන් හඬ කැවීම් ශිල්පිණියක ලෙස කටයුතු කරන ඇය ”යා ටී. වී.” ආයතනයට ගොස් සිටි මොහොතක මේ ”ඉනියවන්” චිත‍්‍රපටයේ රගපෑමට අවස්ථාව විවර වූ බව සඳහන් කරන්නීය.

”යා ටී. වී. එකේ මගේ මිතුරකු තමයි මට මේ අවස්ථාව ගැන  මුලින්ම කිව්වේ. ඇත්තටම නිරංජනී මෙහි රඟපාන බව දැන ගත්තෙ පසුවයි. ඊට කලින් මම නිරංජිව දන්නවා. නේත‍්‍රා ටී. වී. එකේ සම්මුඛ පරීක්ෂණයට අපි දෙන්නා සහභාගී වුණේ එකම දවසේදීයි. ඒ හඳුනා ගැනීම තිබුණා. ඒ නිසා පළමු චිත‍්‍රපටයේ දෙදෙනාට රඟපාන්න ලැබීම ගැන ගොඩාක් සතුටු වුණා.

”ඉනියවන්” චිත‍්‍රපටයට දායක වූ සුභාෂිනී ද නිරංජනී  මෙන් යාපනයට ගොස් ඇත්තේ පළමු වතාවටය. ඒ මෙහි ?ගත කිරීම් වෙනුවෙනි.
මේ චිත‍්‍රපටයට දායකවීම නිසා ලැබුණු දේ බොහෝ යැයි පවසන ඇය නල්ලූර් කෝවිලට යාම සහ යාපනයට යාමට ලැබීම මහත් පිනක් සේ සලකන්නීය.
”ඒ  විතරක් නොවෙයි, අවුරුදු හතරක් නිවේදිකාවක ලෙස කැමරාව ඉදිරියේ හිටපු මට ඉනියවන් රඟපෑම නිසා චිත‍්‍රපට රංගනය මොකක්ද කියලා හරියටම  දැන ගන්න ලැබුණා.

ඉනියවන් දෙබස්  අඩු චිත‍්‍රපටයක්. එවැනි චිත‍්‍රපටයක රඟපෑ යුතු විදිය අධ්‍යක්‍ෂවරයා අපූරුවට අපට  කියලා දුන්නා.”
මේ විදියට පවසන සුභාෂිනී මෙන්ම නිරංජනී වයස අවුරුදු 23 සීමාවේ සිටින තරුණියන් දෙදෙනෙකි. ශ්‍රී ලාංකීය චිත‍්‍රපට කලාවට මෙලෙසින් පැමිණි මේ දෙදෙනා රංගනයෙන් බොහෝ දුර යා හැකි දක්ෂතා ඇති ශිල්පිණියන් දෙදෙනෙක් බව වටහා ගත් අශෝක හඳගමට ස්තුති පුද කිරීමට අමතක කළේද නැත.