ඉන්දියාවේ උත්තර ප්‍රාන්තයේ    බස් රථයක් පෙරලීමෙන්   තුවාල ලබා එරට රෝහල් ගතකර සිටි  වන්දනා නඩයකට අයත් ශ්‍රී ලාංකිකයෝ දහතුන් දෙනෙක්   අද  මිහින් ලංකා  ගුවන් යානයකින් කටුනායකට   පැමිණියහ.

මෙම වන්දනා නඩයේ එක් අයෙකු හැර සෙසු සියල්ලෝම තුවාල ලදහ. මොවුහු  කැලණිය සහ කුරුණෑගල  ප්‍රදේශ වල  පදිංචි කරුවෝ වෙති. තුවාල ලැබූවන් අතර කාන්තාවෝ දස දෙනෙක් ද අතර පිරිමි දෙදෙනෙක් ද  වූහ.

එක් කාන්තාවකගේ අත වැලමිට ප්‍රදේශයෙන් කපා ඉවත් කැර තිබිණි. මේ අතර හිසට  බරපතල ලෙස මැහුම්  දමා සිටි කාන්තාවෝ දෙදෙනෙක් ද වූහ.

තුවාලකරුවන් අතර ප්‍රවීන ගායිකා සුජාතා අත්තනායක‍ගේ සොහොයුරිය වන රංජනී පෙරේරා මහත්මිය ද සිටී.   සුජාතා අත්තනායක මහත්මියද කදුළු පිරි දෙනෙතින් යුතුව තම සොයුරිය රැගෙන යාම සඳහා කටුනායක ජාත්‍යන්තර ගුවන්තොටුපොළට පැමිණ සිටියාය.

වීදුරු කටු ඇණීමෙන් තුවාල ලද්දෝ ද වූහ.

දිල්ලි බෞද්ධ වන්දනා මධ්‍යස්ථානයේ පල්ලේගම විජිත හිමියන් විසින් මෙම පිරිසට ආපසු දිවයිනට පැමිණීම සදහා ඉතා අඩු මුදලට ගුවන් ටිකට් පත් ලබා දෙන ලෙස මිහින් ලංකා ගුවන් සේවයෙන් කරන ලද ඉල්ලීමකට  අනුව   අවම මුදලකට ගුවන් ටිකට් පත් ලබා දුන් බව එම ගුවන්සේවයේ රාජ්‍ය හා පොදු කටයුතු පිළිබඳ කලමනාකාරී ගාමිණී අබේවර්ධන මහතා කීවේය.

මොවුහු පසුගිය පෙබරවාරි 07 වෙනිදා උදෑසන  බෞද්ධ සිද්ධස්ථාන වන්දනාමාන කිරීමේ අරමුනින් ඉන්දියාවේ චෙන්නායි  නුවර ගියහග පසුව චෙන්නායි සිට දිල්ලිය වෙත දුම්රියෙන් ගමන් කිරීමෙන් අනතුරුව බස් රථයකින් අග්‍රා වෙත ගොස්  එතැන් සිට  බරණැස බලා  ගමන් කරමින් සිටියදී අනතුර සිදු විය.

තමන් අනතුරට පත්වන විට බස් රථය පැදවූවේ රියදුරා නොව රියදුරු සහයට ගිය බසයේ අයිතිකරුගේ  පුතා  බව   තුවාලකරුවෝ  පැවසූහ.

බසය එකවරම ශබ්ද නගමින් පැද්දී ගොස් පෙරලී ගිය බවත් එවිට රියදුරා සහ ගෝලයා දෙදෙනාම බස්යෙන් ඉවතට පැන ඇති බවත් මොවුහු කියති. යමි හෙයකින් රියදුරා පැදවුවේ නම් කෙසේ හෝ පෙරලී යාමට ඉඩනොදී පාලනය කරගැනීමට හැකියාව තිබූ බවද කීහ.

එසේම දින දාහතරක් ඉන්දියාවේ වන්දනාමාන කිරීමේ අරමුණින් දිවයිනෙන් පිටත්ව ගියද කිසිදු සිද්ධස්ථානයක් වැදපුදා ගැනීමට නොහැකිවූ බවද මොවුහු පැවසූහ.

 සීතා ජයසුන්දර මහත්මිය මෙසේ කීවාය.

‘අපි පසුගිය 07 වෙනිදා මුලින්ම ගුවනින් චෙන්නායි වලට ගියා. එදින රාත්‍රිය අපි චෙන්නායි වල ගතකලා. පසුවදා උදෑසන අපි දුම්රියෙන් දිල්ලි වෙත පිටත් වුනා. දිල්ලි වලට ආවේ 9 වෙනිදා. ඉන්පසු 10 වෙනිදා බරනැස බලා පිටත්වුනා ඒ අතරමගදී තමයි මේ අනතුර සිදුවුනේ.

අපි බරණැස බලා එනකොට රියදුරු මහතා වාහනය පදවාගෙන ගියා. නමුත් ටික දුරක් යන විට බස් අයිතිකරුගේ පුතා කියලා කියපු කෙනෙක් බස්රථයේ සුක්කනාම අතට ගත්තා. වාහනය වේගයෙන් පදවාගෙන ගියා.

පස්සේ පොලිස්යෙන් ඇවිත් ඒ දෙන්න  අරගෙන ගියා. ඒත් එක්කම අපේ තුවාල කාරයින්ව ඇම්බියුලන්ස් එකක් රැගෙන විත් උත්තර ප්‍රාන්තයේ සයිිෆා කියන රෝහලට ඇතුලත් කළා.  අපිට රෝහලෙන් හොඳට සැලකුවා. උත්තර ප්‍රාන්තයේ මහා ඇමති තුමා අප බලන්න නියෝජිතයින් එවාා තිබුණා.

මගේ හිසට මැහුම් 17 ක් දාලා තියෙනවා. දුක හිතෙන සිද්ධිය තමයි අපි එක්ක ගියා කුරුණෑගල පැත්තේ දෙන්නෙක්. ඒ මිනිස්සු හරිම අහිංසකයි. ඒ නෝනගේ අත කපන්න සිදුවණා. එයාගේ මහත්තයටත් තුවාලයි. අන්තිම අහිංසක අසරණ මිනිස්සු.

අපිට දැනගන්නට ලැබුනා අප රක්ෂණය කර නැති බව . මම රජයෙන් ඉල්ලා සිටිනවා විශේෂයෙන් ඉන්දියාවට වන්දනා නඩ යනවිට රක්ෂනය කරලද යවන්නේ කියලා සොයා බලන්න.‘

සුජාතා අත්තනායක මහත්මියගේ සොයුරිය වන රංජනී පෙරේරා මහත්මිය මෙසේ කීවාය.

‘අපි අග්‍රා වල සිට  සැතපුම් 70 ක් පමණ දුරක් එනවිට එක පාරටම බස්එක දඩ දඩ ගාලා සෙලවුනා. ඉන්පස්සේ තමයි  පෙරළුණේ . අප අනතුරට පත් වූ අවස්ථාෙවි සිට අපට උදවි කල දිල්ලි වල බෞද්ධ මධ්‍යද්ථානයේ පල්ලේගම විජිත හිමියන්ටත් උත්තර ප්‍රාන්ත මහ ඇමතටත්ල සාරානාත් පන්සලේ හාමුදුරුවන්ටත් අපේ  ස්තුතිය පුද කරනවා. ඒ අයගේ මැදිහත්වීම නිසා තමයි අපේ ලෙඩිඩුන්ටත් හොදින් ප්‍රථීකාර ලබාගෙන අප සියලූ දෙනාටම මේ තරමි ඉක්මනින් එන්න ලැබුනේ.‘

මෙම අනතුරින්   නඩයේ ප්‍රධාන සංවිධායකවයා වූ කොලොන්නාවේ පදිංචි බී.එච්.එම්.ඩබිලිවි බංඩාර මහතාද තුවාල ලැබීයග ඔහු  පැවසුෙවි  74 වතාවක් පමණ මේ අයුරින් වන්දනා නඩ රැගෙන ඉන්දියාවට ගොස් ඇති බවත් මේ පිළිබඳව ඉතා කනගාටුවන බවත්ය.    මෙම පිරිස රක්ෂණය කර ගෙන ගියේද යන්න පිළිබඳව විමසුවද ඒ පිළිබඳව පැහැදිලි පිලිතුරක් ලබා ගැනීමට නොහැකි විය.

 සුසන්ත ජයසුන්දර මහතා මෙසේ කීවේය.

 ‘අපි එක්කෙනෙක් රුපියල් අසූදහසක් ගෙවා තියෙනවා මේ ගමන යන්න. අන්තිමට අපිට කිසිම තැනක් වන්දනා මාන කරන්න ලැබුනේ නැහැ.  සංවිධායක මහත්තය නමි කිව්වා නැවත අප රැගෙන යනවා කියලා. නමුත්  මෙතන ඉන්න හුඟ දෙනෙකු මෙයා එක්ක මේ ගමන නැවත යන්න කැමති වෙන එකක් නැහැ.‘