නුගේගොඩ, කුරුණෑගල සහ අනුරාධපුර යන ලයිසියම් ජාත්‍යන්තර පාසල්වල සිසු දරු දැරියන් සම්බන්ධ වූ විශේෂ සංස්කෘතික හුවමාරු වැඩසටහනක් ඊයේ (21) නුගේගොඩ ලයිසියම් ජාත්‍යන්තර පාසලේදී අති උත්කර්ෂවත් අන්දමින් පැවැත්විණි.

‘ශ්‍රී ලංකා සිසුන්ට චීන සංස්කෘතිය’ (Chinese Culture Meets Sri Lankan Students) යන තේමාව යටතේ සංවිධානය කරන ලද මෙම වැඩසටහන හරහා චීන සංස්කෘතිය සජීවීව අත්විඳීමට සිසුන්ට අනගි අවස්ථාවක් උදාවිය.

චීන තානාපති කාර්යාලය සහ ලුම්බිණි කොන්ෆියුසියස් පන්ති කාමරය (Lumbini Confucius Classroom) යන ආයතනවල සහයෝගය ඇතිව ක්‍රියාත්මක වූ මෙම වැඩසටහනේ දී සාම්ප්‍රදායික නැටුම්, සංගීතය, චීන සටන් කලාව, කැලිග්‍රැෆි සහ චිත්‍ර කලාව සම්බන්ධයෙන් වැඩමුළු රැසක් ද පැවැත්විණි.

චීන සංස්කෘතියේ සුවිශේෂී පුරාවස්තු ඇතුළත් ප්‍රදර්ශනයක් ද මෙහිදී සංවිධානය කර තිබිණි. මෙම සංස්කෘතික වැඩසටහනට සමගාමීව, ඊට සහභාගී වූ දරු දැරියන්ගේ අධ්‍යාපන කටයුතු ඉහළ නංවාලීමේ අරමුණින් වටිනා අධ්‍යාපනික උපකරණ පරිත්‍යාග කිරීමක් ද සිදුවිය.