ශ්‍රී ලංකා ක‍්‍රිකට් කණ්ඩායම ශ්‍රී ලංකාවේදී සහභාගි වන අන්තර්ජාතික ක‍්‍රිකට් තරගවල රූපවාහිනී අයිතිය වසර හතක කාලයක් සඳහා ඩොලර් මිලියන 53 කට විකිණීමේ සූදානමක් ඇතැයි ඉතාමත් විශ්වාස කටයුතු ආරංචි මාර්ග වලින් වාර්තා වේ. ශී‍්‍ර ලංකා කි‍්‍රකට් ආයතනය සමග දිගු කාලීන සම්බන්ධතා ඇති ප‍්‍රකට රූපවාහිනී සමාගමක් ඒ සඳහා ඉදිරිපත් වී ඇතැයිද වාර්තාවේ.
කෙසේ වෙතත් මෙම රූපවාහිනී විකාශන අයිතිය අළෙවි කිරීම සඳහා ශ්‍රී ලංකා ක‍්‍රිකට් ආයතනය කමිටුවක් පත්කර ඇති නමුත් මේ දක්වා ඒ සඳහා ඩෙන්ඩර් කැඳවා නොමැති බවත් වාර්තා වේ.
මේ පිළිබඳව ‘ලංකාදීප’ කළ විමසුමකදී ශ්‍රී ලංකා ක‍්‍රිකට් ආයතනයේ විධායක කමිටු නිලධාරියකු- පැවසුවේ තමන් ඒ පිළිබඳව කිසිවක් නොදන්නා බවත් එය විශේෂ කමිටුවකින් මගින් ක‍්‍රියාත්මක කරන බවත්ය. එහෙත් අදාළ කමිටු සාමාජිකයකුගෙන් ඒ පිළිබඳව කළ විසීමකදී ඔහු කියා සිටියේ රූපවාහිනී අයිතිවාසිකම් වැනි දැවැන්ත කාර්යයක් සම්බන්ධයෙන් විධායක කමිටුව සෘජුවම මැදිහත් වන බවයි.
ශ්‍රී ලංකා ක‍්‍රිකට් ආයතනයේ හිටපු නිලධාරියකු පැවසුවේ මෙම විකාශන අයිතිය ඩොලර් මිලියන 60 කට වැඩි මුදලකට අළෙවි කළ හැකි බවත් ඒ සඳහා ටෙන්ඩර් කැඳවීම් අනිවාර්ය බවත්ය.