ආචාර්ය ශිරානි බණ්ඩාරනායක අගවිනිසුරුවරියට එරෙහිව දෝෂාභියෝගයක් සඳහා රජයේ මන්ත‍්‍රීන් සියයට වැඩි පිරිසක් අත්සන් කැර ඇතැයි රජයට සමීප ආරංචි කියයි. අගවිනිසුරුවරියගේ ක‍්‍රියා කලාපයට එරෙහිව මේ යෝජනාව කතානායක චමල් රාජපක්‍ෂ මහතාට බාරදීමට නියමිතය. මෙවැනි යෝජනාවකට රජය අරඅදිතිය එක්සත් ජාතික පක්‍ෂය හා ජනතා විමුක්ති පෙරමුණ පසුගිය දින කිහිපයේ චෝදනා කළේය. අධිකරණ විනිසුරුවරයකු ඉවත් කිරීම සඳහා ශ්‍රී ලංකා ආණ්ඩුක්‍රම ව්‍යවස්ථාවේ 107 වැනි වගන්තිය යටතේ පනවා ඇති විධිවිධාන මෙසේය. අධිකරණ ස්වාධීනත්වය 107 - (1) අග‍්‍රවිශ්චයකාරවරයා ද අභියාචනාධිකරණයේ සභාපතිවරයා ද ශ්‍රේෂ්ඨාධිකරණයේ හා අභියාවනාධිකරණයේ වෙනත් සෑම විනිශ්චයකාරවරයෙක් ද ජනරජයේ ජනාධිපතිවරයා විසින් ස්වකීය අත්සන යටතේ වූ අධිකාර පත‍්‍රයක් මගින් පත් කරනු ලබන්නාහ. (2) ඉහත කී සෑම විනිශ්චයකාරවරයෙක් ම යථා පැවැත්මෙන් සිටිනා තාක් ධුරය දරන්නේය. ඒ යම්කිසි  විනිශ්චයකාරවරයකු ඉවත් කිරීම සඳහා ඔප්පු වී ඇති විෂම පැවැත්ම හෝ අබලතාව හෝ පදනම් කොට ගෙන (නොපැමිණි මන්තී‍්‍රවරයන්ද ඇතුළුව) පාර්ලිමේන්තුවේ මුළු මන්තී‍්‍රවරයන් සංඛ්‍යාවෙන් බහුතර සංඛ්‍යාවක් විසින් සම්මත කරන ලද පාර්ලිමේන්තුවේ යෝජනාවක් ජනාධිපතිවරයා වෙත ඉදිරිපත් කරනු ලැබීමෙන් පසුව ජනාධිපතිවරයා විසින් කරන ලද නියමයකින් හැර ඒ විනිශ්චයකාවරයකු ඉවත් කළ නොහැක්කේය. එසේ වුවද එවැනි යෝජනාවක් ඉදිරිපත් කිරීම සඳහා වූ යෝජනා සම්මතය පිළිබඳ දැන්වීම පාර්ලිමේන්තුවේ මුළු මන්තී‍්‍රවරයන් සංඛ්‍යාවෙන් යටත් පිරිසෙයින් තුනෙන් එකක් විසින් අත්සන් තබා ඇත්නම් හා චෝදිත විෂම පැවැත්ම හෝ අබලතාව පිළිබඳ සම්පුර්ණ විස්තර එහි දක්වා ඇත්නම් මිස කථානායකවරයා විසින් එවැනි යෝජනාවක් ඉදිරිපත් කිරීම සඳහා වූ කිසිම යෝජනා සම්මතයක් භාරගැනීම හෝ පාර්ලිමේන්තුවේ න්‍යාය පත‍්‍රයට ඇතුළත් කිරීම හෝ නොකළ යුත්තේය. (3) ඒ යෝජනා සම්මත කිරීමේ කාර්ය පටිපාටියද ඇතුළුව එවැනි යෝජනාවක් ඉදිරිපත් කිරීම සම්බන්ධව වූද චෝදිත විෂම පැවැත්ම හෝ අබලතාව විමර්ශනය කිරීම සහා ඔප්පු කිරීම  සම්බන්ධ වූද විනිශ්චයකාරවරයාට පෞද්ගලිකවම හෝ නියෝජිතයකු මගින් හෝ පෙනී සිටීමට සහ කරුණු  දක්වා සිටීමට ඇති අයිතිය සම්බන්ධව වූ ද සියලූ කාරණා සඳහා පාර්ලිමේන්තුව විසින් නීති මගින් හෝ ස්ථාවර  නියෝග හෝ විධිවිධාන සැලැස්විය යුත්තේය.