(අංජුල මහික වීරරත්න)

ලංකාවට සාර්ථක රාජ්‍ය පෞද්ගලික හවුල්කාරීත්වයක් අවශ්‍ය බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පැවසීය.

එය රට ඉදිරියේ පවතින අභියෝගයක් බවද අමාත්‍යවරයා කීය.

ලංකා හොස්පිටල්ස් (Lanka Hospital) විසින් නව ප්‍රජා කේන්ද්‍රීය සත්කාර සේවාවන් ද්විත්වයක් වන කම්පන ප්‍රතිකාර සේවාව වන ලංකා ලයිෆ් ලයින් (Lanka Life Line) සහ එහි පුළුල් පරාසයක විහිදුණු ගෘහස්ත සත්කාර සේවාව වන ලංකා කෙයාර් (Lanka Care) හඳුන්වා දීම  සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් සහ සංචාරක නියෝජ්‍ය අමාත්‍ය මහාචාර්ය රුවන් රණසිංහ යන මහත්වරුන්ගේ සහභාගීත්වයෙන් අද සිදුකෙරිණි.

නවතම කම්පන සත්කාර සේවාව වන ලංකා ලයිෆ් ලයින් සේවාව යනු කම්පනයට ගොදුරු වූ රෝගීන් ( අනතුරක්, අපරාධයක් හෝ ස්වාභාවික විපතක් වැනි භයානක සිදුවීමක් කෙරෙහි වූ චිත්ත වේගීය ප්‍රතිචාරය) සඳහා පැය 24 පුරා සහ අඛණ්ඩ ප්‍රතිචාර දැක්වීමේ පද්ධතියක් ක්‍රියාත්මක කිරීම වන අතර, අනෙක් හඳුන්වාදීම වන ලංකා කෙයාර් සේවාවේ දී නිවසේ දී පමණක් නොව, බොහෝ දුර බැහැර සිටින තම ආදරණීයන් වෙත පවා වෛද්‍ය ප්‍රතිකාර ලබාදිය හැකි ආකාරය වඩාත් පහසු කරමින් යළි ප්‍රතිනිර්මාණය කිරීමක් වේ. මෙහි දී පුහුණුව ලත් රැකබලා ගන්නන් විසින් විශේෂඥ හෙද සේවය, භෞත චිකිත්සාව, ඖෂධ කළමනාකරණය සහ දුරකථන හරහා සිදුවන දුරස්ථ උපදේශන ලබාදෙන අතරම, විනිවිදභාවයෙන්, රෝගියාගේ ආරක්ෂාව යළි සහතික කරමින් සහ මානසික සහනය සලසමින් පවුලේ සාමාජිකයන් සමග සමීපව කටයුතු කරනු ලැබේ.

මෙහිදි මෙම නව ප්‍රජා කේන්ද්‍රීය සත්කාර සේවාවන් දියත් කිරීමේ කැපී පෙනෙන සිදුවීමක් ලෙස ප්‍රජාවට පහසුවෙන් ප්‍රවේශ විය හැකි සහ පවුලට ප්‍රමුඛත්වය දෙන සෞඛ්‍ය සේවාවක් සඳහා වූ මහජන විශ්වාසය කෙරෙහි වේගයෙන් වර්ධනය වන ඉල්ලුම සංකේතවත් කරමින්, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාට 1,000 වන ලංකා කෙයාර් සාමාජික කාඩ්පත බාරදීම ද මෙහි දී සිදු විය.