(සුජිත් හේවාජුලිගේ)

විශ්‍රාම ලැබූ උසස් නිලධාරියෙකු පාර්ලිමේන්තුවේ එක්තරා සභාවක ලේකම් ධූරයකට  පත්  කර වැටුප් හා වෙනත් පහසුකම් වසර දෙකකට ආසන්න  කාලයක් තිස්සේ  ලබාදීමෙන් රජය මේ දක්වා  රුපියල්  කෝටියකට  වැඩි  අමතර වැය බරක් දරා ඇතැයි පාර්ලිමේන්තු ආරංචි මාර්ග සඳහන් කළේය.

මෙම නිලධාරියා වෙනුවෙන් මාසිකව රුපියල් ලක්ෂ හයකට ආසන්න දීමනාවක් මෙන්ම වෙනත් පහසුකම්  දෙන  බව පාර්ලිමේන්තු නිලධාරීහු පෙන්වා දෙති.

මෙම සභාවේ ලේකම් ධූරය දැනට පාර්ලිමේන්තුවේ මහලේකම් වරියටම  කරගෙන යෑමට හැකියාව තිබියදී විශ්‍රාමික නිලධාරියෙකු පත් කිරීම විහිළු සහගත කාරණයක් බව එම නිලධාරීහු සඳහන් කරති.

මෙම නිලධාරියා වසර විසි නවයක සේවයෙන් පසුව පසුගිය වසරේ මැයි මාසයේදී  විශ්‍රාම ලැබුවේය.

විශ්‍රාම ගොස් දින කිහිපයකින් පසු මෙම සභාවේ ලේකම් ධූරයට ඔහු පත් කෙරුණේ පසුගිය රජයේ ප්‍රධානියකුගේ ආශිර්වාදයෙන් බව දැනගන්නට ඇත. දූෂණය නාස්තිය පිටුදැකීමට කටයුතු කරන්නේ නම් මේ කාරණය පිළිබඳව රජයේ අවධානය යොමු විය යුතු බව පාර්ලිමේන්තු සේවකයෝ ප්‍රකාශ කරති.