(අංජුල මහික වීරරත්න)

නව තැපැල් කාර්යාල ඉදිකිරීම සදහා මෙවර අයවැයේ රුපියල් කෝටි 60ක මුදලක් වෙන්කර තිබෙන බව සෞඛ්‍ය සහ ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පැවසීය.

ඒ අනුව නව තැපැල් කාර්යාල විස්සක් ඉදිකිරීමට බලාපොරොත්තු වන බව අමාත්‍යවරයා කීය.

මීට දින කිහිපයකට පෙර ගලේවෙල තැපැල් කාර්යාලයේ ඉදිකිරීම් ආරම්භ කළ බව කී අමාත්‍යවරයා  ඉදිරියේ දී යාපනය, මඩකලපුව, හම්බන්තොට, ගාල්ල, මහනුවර ඇතුළු ප්‍රදේශ ගනණාවක තැපැල් කාර්යාල ඉදිකිරීම් සඳහාත් දඹුල්ල තැපැල් මෙහෙයුම් මධ්‍යස්ථානය ඉදිකිරීමටත් අවශ්‍ය මුදල් වෙන්කර ඇතැයි පැවසීය.

මාතලේ මහවෙල නව තැපැල් කාර්යාලය සහ කුරුණෑගල දිස්ත්‍රික්කයේ දොඩම්ගස්ලන්ද නව තැපැල් කාර්යාලය සදහා මුල්ගල තැබීමේ අවස්ථාවන්ට සහභාගී වෙමින් අමාත්‍යවරයා මේ බව කීය.

තැපැල් දෙපාර්තමේන්තුවේ මූල්‍ය ප්‍රතිපාදන මත ඉදිකරීමට යෝජිත මහවෙල නව තැපැල් කාර්යාල ගොඩනැගිල්ල සඳහා වෙන්කර ඇති මුදල රුපියල් මිලියන 14.41 ක් වන අතර  දොඩම්ගස්ලන්ද නව තැපැල් කාර්යාලය ඉදිකිරීම සඳහා වෙන් කර ඇති මුදල රුපියල් මිලියන 14.71 කි. 

තැපැල් කාර්යාල නවීකරණය කිරීමට තවත් රුපියල් කෝටි 60 මුදලක් වෙන් කර ඇතැයි ද අමාත්‍යවරයා මෙහිදී කීය.

මෙරට ඓතිහාසික තැපැල් කාර්යාල වන මහනුවර, නුවරඑළිය වැනි තැපැල් කාර්යාල ඇතුළුව තැපැල් කාර්යාල 209ක් නවීකරණය කිරීමට කටයුතු කරන බව අමාත්‍යවරයා පැවැසීය.