(ක්‍රිෂාන් ජීවක ජයරුක්)
 
රුහුණු විශ්ව විද්‍යාලයේ පළමු වසරේ අධ්‍යාපනය හැදෑරීමට පැමිණි 26 හැවිරිදි නවක හිමි නමකට එහි භික්ෂු නේවාසිකාගාරය තුළදී සිවුර ගලවා නිරුවත් කොට අමානුෂික ලෙස නවක වධය ලබා දීම සම්බන්ධයෙන් සැක පිට අත්අඩංගුවට ගත් එම විශ්ව විද්‍යාලයේ ඡ්‍යෙෂ්ඨ ශිෂ්‍ය භික්ෂූන් 5 නමක් ලබන 30 වැනිදා තෙක් රිමාන්ඩ් භාරයේ තබන ලෙස මාතර මහේස්ත්‍රාත් පවිත්‍රා සංජීවනී පතිරණ මහත්මිය අද (19) නියෝග කළාය.
 
එසේ රිමාන්ඩ් භාරයට පත් කෙරුණේ එම විශ්ව විද්‍යාලයේ දෙවන වසරේ ඉගෙනුම ලබන මාතර සියඹලාගොඩ ධම්මික,  හික්කඩුවේ ඇටම්පිටියේ ධම්මරක්ඛිත , බඩල්කුඹුරේ ලුණුගල ජනපදයේ පඤ්ඤාසාර , බණ්ඩාරවෙල හටන්ගල අමිත  හා බලංගොඩ දෙනගම සෝභිත යන හිමිවරුන්ය.
 
වැඩි ආරක්ෂාව වෙනුවෙන් නවක සිසුන් පිළිගැනීමේ කාල සීමාව පසුකොට අදාල හිමිනම ඉකුත් 09 වැනිදා රුහුණු විශ්ව විද්‍යාලයේ මානව ශාස්ත්‍ර හා සමාජ විද්‍යා පීඨයට ඇතුළත්වී තිබෙන බවද එදින රාත්‍රීයේදී මෙම නවක වධ සිද්ධියට භාජනය වී තිබෙන බවද පොලීසිය පැවසීය.
 
භික්ෂු නේවාසිකාගාරයේ නාන කාමරය තුලදී සැකකාර හිමිවරුන් පැමිණිලිකාර හිමියන් නිරුවත් කොට නවක වධය ලබා දී තිබෙන බව පොලීසිය අධිකරණය හමුවේ කරුණු දක්වමින් කියා සිටියේය.
 
කෙසේ වෙතත් පැමිණිලිකාර හිමියන්ට වෛද්‍ය පරීක්ෂණයකට පෙනී සිටීම සඳහා පොලීසිය මාතර මහ රෝහල වෙත ඇතුලත්වන ලෙසට උපදෙස් ලබා දී තිබුණද උන්වහන්සේ නැවත සරසවි අධ්‍යාපනයට නොයන බව පවසා වැඩවසන විහාරස්ථානය වෙත නික්ම ගොස් තිබේ.
 
මාතර මූලස්ථාන පොලීසියේ අපරාධ විමර්ශන ඒකකය මේ පිලිබඳව වැඩිදුර පරීක්ෂණ සිදුකරයි.