(ක්‍රිෂාන් ජීවක ජයරුක්)

දෙවිනුවර උත්පලවර්ණ ශ්‍රී විෂ්ණු දේවාලයේ වාර්ෂික ඇසළ උත්සවය ආරම්භ වු අද (01) දින කප් සිටුවීමේ චාරිත්‍රය සිදු වන අවස්ථාවේ දී දේවාලයේ ප්‍රධාන කපු  මහතා සහ පුද්ගලයින්  කිහිපදෙනකු අතර  ගුටි බැට හුවමාරුවක් සිදු වී දැඩි නොසන්සුන් තත්වයක් හට ගත්තේය.

වෙනදා  එළිමහනේ සිදු කරන කප් සිටුවීමේ  චාරිත්‍රය කපු මහතා විසින් මෙවර දේවාලය තුළ සිදු කිරීමෙන්  පැමිණ සිටි බැතිමතුන් අපහසුතාවටයට පත් වී යැයි කියන සිද්ධියක් සම්බන්ධයෙන් මෙම  ගැටුම හටගෙන තිබේ.
 
බස්නායක නිලමේවරයාගේ සහෝදරයකු සහ තවත් පුද්ගලයකු  දේවාලයේ කපු මහතා  සමඟ මෙම ගැටුම ඇති කරගෙන   ඇත.
 
මේ නිසා බැතිමතුන්ට සුපුරුදු පරිදි කප් සිටුවීමේ චාරිත්‍රය සිදු කිරීමට නොහැකි වී තිබේ.
 
මෙම සිදුවීම  පිළිබඳව පැමිණිල්ලක් කිරීමට යන බව එම දේවාලයේ ප්‍රධාන කපු රාම ක්‍රිෂ්ණ තේනබදු මහතා පැවසීය. කෙසේ වෙතත් ඇති වු නොසන්සුන්තාවය පොලීසිය මැදිහත් වී පාලනය කළේය.
 
ඔවුහු පෙරේදා (31) රාත්‍රි කාලයේ සිට නැකැතට කප් සිටුවීමේ අවස්ථාවට දායක වීම සදහා දේවාල භූමියේ රැදී සිටියහ. රාත්‍රී කාලයේ දී එම චාරිත්‍රය සිදුවේ යයි බොහෝ දෙනෙකු සිතා සිටියද නැකැත යෙදී තිබුණේ අද  (01) උදෑසන 8.49 ට පමණය.

මේ   පිළිබඳව ප්‍රධාන කපු රාම ක්‍රිෂ්ණ තේනබදු මහතාගෙන් විමසූ විට මෙසේ කීය.

“පසුගිය වසර කිහිපය තුළ ඇතිවු තත්වය මත මෙවර කප් සිටුවීම දේවාලය තුළ සිදු කරන බවට මා බෞද්ධ කටයුතු කොමසාරිස්වරයාට පවා ලිඛිතව දැනුවත් කර තිබෙනවා.ඒ සදහා බස්නායක නිලමේවරයා පැමිණි පසු ඔහු සමග සිටි සහෝදරයෙකු හා තවත් අයෙකු මට පහර දුන්නා.

නිලමේවරයාට ඔවුන්ට එහිදී අවවාද කළා.නමුත් මම ඒ ගැන පොලීසියට පැමිණිලි කරන්න බලාපොරොත්තු වෙනවා. නිසි පරිදි කප් සිටුවීමේ චාරිත්‍රය මා අකුරටම සිදු කළා.ඊට පසුව කුපිතව සිටි පිරිස දේවාලය තුළ තිබු පැරණි කප් ගසක් පිටතට රැගෙන ගොස් පඩුරු ගැට ගැසීම සිදු කර තිබෙනවා.”