(විනීතා එම් ගමගේ)


කුවේට් හි නිවසක සේවය කරමින් සිටිය දී රුපියල් කෝටි 13 ක මුදලක් සොරකම් කළේ යැයි චෝදනාවක් එල්ල වූ ශ්‍රී ලාංකික සේවකයෙකු එම චෝදනා වලින් නිදොස් කොට නිදහස් කර ගැනීමට එරට ශ්‍රී ලංකා තානාපති කාර්යාලයේ නිලධාරිහු සමත්ව ඇත. 


සොරකම් චෝදනාව මත චෝදනා එල්ල කර වද හිංසාවලට ද ලක්කර ඇති මෙම සේවකයා වෙනුවෙන් නීතිමය ක‍්‍රියාමාර්ග ගැනීමට එරට තානාපති කාර්යාලය මැදිහත් වී ඇත්තේ එවකට විදේශ රැකියා ඇමතිනිය වූ තලතා අතුකෝරල මහත්මිය ගේ උපදෙස් මතය.

 
මෙම සිද්ධියට මුහුණ දී ඇත්තේ මතුගම යටියන අගලවත්තේ පදිංචි බියුටි චතුරංග මහතාය. ඔහු සියලූ චෝදනාවලින් නිදොස් කොට නිදහස් කළ පසු ඉකුත් දා දිවයිනට පැමිණි අතර තමන් වෙනුවෙන් වහා ක‍්‍රියාත්මක වූ අමාත්‍යවරිය බැහැ දකින්නට අධිකරණ අමාත්‍යංශය වෙත පැමිණියේය.


ඒකාබද්ධ විපක්ෂය නියෝජනය කරන කළුතර දිස්ත‍්‍රික් පාර්ලිමේන්තු මන්ත‍්‍රී ජයන්ත සමරවීර මහතා විසින් චතුරංග මහතා පිළිබඳ  ප‍්‍රශ්නය අතුකෝරල මහත්මිය වෙත දැනුම් දී තිබු අතර ඒ අනුව අමාත්‍යවරිය මෙම පියවර ගෙන තිබිණි. 


අමාත්‍යවරිය හමුවූ චතුරංග මහතා තමන් මුහුණ දුන් සිද්ධිය පිළිබඳව මෙසේ හෙළි කළේය.


‘‘මම කුවේට්වල සේවයට ගිහින් අවුරුදු දෙකක් යද්දි මාව හොරකමකට අහුවුණා. ලංකාවේ මුදලින් කෝටි 13 ක්. මම ජීවිතය නැති කරගන්නයි ගියේ. මම ඒ වෙලාවේ ජයන්ත සමරවීර මන්ත‍්‍රීතුමාට කථා කරල මොනව හරි කරන්න පුළුවන් ද කියල ඇහුවා. ඔහු ඇමතිතුමියට කියලා. එතුමිය වහා සොයා බලා මගේ ජීවිතය බේර ගත්තා. ඇමතිතුමිය පාලනය කරන කාලේ තානාපති කාර්යාලවලින් ලොකු සේවයක් වුණා. යැයි ද චතුරංග මහතා කියා සිටියේය.