(රංජිත් රාජපක්‍ෂ)  

මධ්‍යම කඳුකරයේ බටහිර බෑවුම් ප‍්‍රදේශවලට පසුගිය දින දෙක තුළ ඇදහැණු අධික වර්ෂාව සහ තද සුළං තත්ත්වය අද (1) පහව ගොස් කඩින් කඩ වැසි පවතින බව වාර්තා වෙයි.

ඉහළ කොත්මලේ ජලාශයේ විවෘත කර තිබු වාන් දොරටු හතරෙන් තුනක් දැනට වසා දමා ඇති බවත් එක් වාන්දොරටුවක් පමණක් තව දුරටත් විවෘතව පවතී. 

තවදුරටත් වැසි ලැබුණහොත් එම ජලාශයේ වාන් දොරටු ස්වයංකි‍්‍රයව විවෘත වන නිසා ජලාශ වේල්ලට පහළින් කොත්මලාඔයේ ජලය පරිහරණය කරන අය සැලකිලිමත්ව සිටින ලෙස විදුලි බලාගාර ඉංජිනේරුවරු පවසති.

කාසල්රි ජලාශයට ප‍්‍රධාන වශයෙන් ජලය සපයන කෙසෙල්ගමුඔයේ ජල මට්ටම ඉහළ යෑම නිසා කාසල්රි ජලාශයේ ජල මට්ටම පිටාර මට්ටමට අඩි පහ දක්වා ආසන්න වි ඇත.

කෙසෙල්ගමුඔය පිටාර ගැලීමෙන් හා අධික සුළං තත්ත්වය හේතුවෙන් වතු නිවාස වලට අලාභ හානි සිදුවීම නිසා බගවන්තලාව සහ නොර්වුඩ් කඳවුරුවල සිටි අවතැන්වු ජනතාවගෙන් විශාල පිරිසක් මේ වන විට ජල මටිටම පහව ගිය නිසා තමන්ගේ නිවාස වෙත ගොස් ඇති බවත් තවදුරටත් කඳවුරුවල රැදීසිටින අයට අවශ්‍ය ආහාරපාන සහ සෞඛ්‍ය පහසුකම් ලබාදීමට පියවර ගෙන ඇති බව දිස්ත්‍රික් ආපදා කලමනාකරණ ඒකකය පවසයි.