(වියලු_ව වාර්තාකරු)
කිරි වැදීමට ආසන්න වෙමින් පවතින ගොයමට සේනා දළඹු උවදුර වැළඳී ඇතැයි පවසා කුඹුරට කෘමිනාශකයක් ඉසීම සඳහා බිරියගේ කරබැඳි රන් මාලය උකස් කිරීමට ඉල්ලා ගෙන ගිය ගොවියකු කටගොන්නක් බී එම කුඹුරේම හතරගාතෙන් වැටී සිටි බව කියැවෙන පුවතක් වාර්තාවේ.

 සිද්ධිය මෙසේය.

 ඔහු අඳේට ලබාගත් කුඹුරු කිහිපයක් වගා කිරීමෙන් දරු පවුල් නඩත්තු කළ පුද්ගලයෙකි.

 මත්පැනට බෙහෙවින් ලොල්වූ පුද්ගලයකු වූ හෙතෙම ගොවිතැනින් මෙන්ම කුලී වැඩ කිරීමෙන් උපයාගත් මුදලින් වැඩි කොටසක් වැයකළේ මත්පැන් සඳහාය. 

 සැමියාගේ හැටි දන්නා ඔහුගේ බිරිය කුලී වැඩ කිරීමෙන් හා පන් කර්මාන්තය කිරීමෙන් උපයාගත් මුදලින් රන් මාලයක් මිලදී ගත්තේ හදිසියක දී හෝ පවුලේ කරදරේකදී හෝ එය උපකාර වනු ඇතැයි සිතීම නිසාය.
 බිරියගේ කරබැඳි මාලය දෙස ඇස ගසා ගෙන සිටි ඔහු එය උකස් කිරීමට මාන බලමින් සිටියේ කලෙක සිටය.

 පසුගිය දිනෙක සත පහක් අතේ නැතුව සිටි ඔහුට අපූරු අදහසක් හිසට නැගුණේය.

“කුඹූර කිරි වදින්නත් ළඟයි. ගොයමට සේනා දළඹු වසංගතය ඇවිල්ලා. කුඹුරට බෙහෙත් ටිකක් ගැහුවෙ නැත්තම් කුඹුරම විනාසයි.” ඔහු සිය බිරියට සේනා දළඹුවා ගැන මෙන්ම රෝගය ගැන ද දිගු විස්තරයක් කළේය.

 සැමියාගේ ගැටයට හසුවූ බිරිය “එහෙනම් මොනවා කරන්නද මේ මාලයවත් උකස් කරලා බෙහෙත් ටිකක් ගහන්න” කියමින් කරබැඳි රන් මාලය ඔහුගේ අත තැබුවේ සේනා දළඹුවාගෙන් කුඹුර බේරා ගන්නටය.

හවස් වන තුරුත් සැමියා ගෙදර නාවේ මන්දැයි සොයා බලද්දී හොඳ වර්ගයේ අරක්කු බෝතලයක්ද තුරුලු_ කරගෙන ඔහු කුඹුරේම ලියද්දක් මත වැතිර සිටිනු දුටු බිරිය “අනේ මගේ මාලය” යැයි කියමින් විලාප දුන්නේය. 

බිරියගේ විලාපය ඇසී එහි පැමිණි අවට කුඹුරුවල වැඩකරමින් සිටි කීප දෙනකු එක්වී ඔහු සිය නිවස වෙත ඔසවාගෙන ගියේ “අනේ මෙහෙමත් එකෙක්” යැයි කියමිනි.